रत्ननगर । रत्ननगर नगरपालिका वडा नं १६ मा व्यावसायीलाई करको दायरामा ल्याउन घरदैलो अभियान सुरु गरिएको छ । करको दायरा बाहिर रहेका व्यवसायीलाई करको दायरामा ल्याउन र व्यवसाय नविकलको लागि वडाका जनप्रतिनिधि र कर्मचारीहरुले घरदैलो अभियान सुरु गरेका हुन् । मंगलबारदेखि सुरु भएको अभियान अन्तर्गत व्यवसायीको घरदैलोमा पुगेको टोलीले कर संकलन, व्यवसाय दर्ता, नविकरण र व्यवसाय दर्ता गरेपछि हुने फाइदाको विषयमा जानकारी समेत दिने गरेको वडाध्यक्ष हेमराज थापाले जानकारी दिए । कृषि र पशुपालनमा निर्भर रहेको सो वडामा व्यवसायिक पसल तथा उद्योगहरु सानो संख्यामा रहेका छन् । वडाभित्र रहेका हरेक किसिमका व्यवसायीलाई करको दायरामा ल्याएर राजश्व संकलन बृद्धि गर्ने लक्ष्य रहेको उनले बताए । सो वडाले आर्थिक बर्ष २०७९÷८० मा ३७ लाख राजश्व संकलन गरेको थियो । चालु आर्थिक बर्षमा ४० लाख संकलन गर्ने लक्ष्य सहित अभियान सुरु गरिएको वडाध्यक्ष थापाले बताए । घरदैलोमा जनप्रतिनिधिहरु वडाध्यक्ष थापा सहित वडा सदस्य रिता विक, सरिता गुरुङ, चिजकुमार श्रेष्ठ, ज्ञानेन्द्र रेग्मी, वडा सचिव मन्जु पौडेल, कम्प्युटर अपरेटर मीना धिताल, दिवस घिमिरे र कार्यालय सहायक कमल दुवाडी रहेका छन् ।