नवलपुर : नवलपरासी (बर्दघाट–सुस्तापूर्व)को कावासोतीमा विषालु च्याउ खाँदा चार जना बिरामी भएका छन् । जिल्ला प्रहरी कार्यालय नवलपुरले दिएको जानकारीअनुसार कावासोती–१४ त्रिभुवनटारमा रहेको एक पोल्ट्री फर्ममा काम गर्ने दुई जना र एउटा बच्चा तथा फर्मका मालिक गरी चार जना बिरामी परेका हुन् ।

कावासोती–१४ स्थित सुरज पोल्ट्री फर्मका कामदारहरु कावासोती–१४ की २४ वर्षीया शान्ति परियार, शान्तिकी ६ वर्षीय छोरी रोशनी परियार, २३ वर्षीया पूर्णिमा परियार र पोल्ट्री फर्म सञ्चालक कावासोती–१४ का ४८ वर्षीया निलकण्ठ तिमिल्सिना बिरामी भएका हुन् ।

प्रहरीका अनुसार उनीहरुले पोल्ट्री फर्मको बारीमा उम्रिएका च्याउ पकाएर खाएका थिए । च्याउ खाइसकेपछि उनीहरु बिरामी परेका हुन् । मंगलबार राती बिरामी परेका उनीहरुको मध्यबिन्दु जिल्ला अस्पतालमा उपचार भइरहेको छ । प्रहरीले बिरामीको अवस्था खतरामुक्त रहेको तथा फर्म सञ्चालक तिमिल्सिनाको थप उपचारका लागि भरतपुरस्थित पुरानो मेडिकल कलेज बताएको छ ।