कालिका, ३ साउन । कालिका नगरपालिकाले नगरक्षेत्रभित्रका दुईवटा सामुदायिक विद्यालयलाई स्कुल बस हस्तान्तरण गरेको छ । वडा नं. ६ मा स्थित माध्यमिक विद्यालय रेडक्रसग्राम र जमुनापुर माध्यमिक विद्यालयलाई आज एक कार्यक्रमका बीच हस्तान्तरण गरिएको हो । कालिका नगरपालिकाका प्रमुख विनोद रेग्मीले सम्बन्धित विद्यालय व्यवस्थापन समितिलाई बस हस्तान्तरण गर्नुभएको हो । सिटकभर र दर्ता बाहेक २४ लाख ६० हजार रुपैयाँमा बस खरिद गरिएको हो । नगरपालिकाले बस खरिदका लागि प्रति वस २५ लाख रुपैयाँ बजेट विनियोजन गरेको थियो । २०४६ सालमा स्थापना भएको माध्यमिक विद्यालय रेडक्रसग्राममा ३ सय ८७ जना विद्यार्थी छन् । विद्यालयले अहिले १ वटा बस दैनिक ५ हजार रुपैयाँ भाडा तिरेर विद्यार्थी बोक्दै आएको थियो । यस्तै जमुनापुर माध्यमिक विद्यालयमा ३ सय १२ जना विद्यार्थी छन् । बस हस्तान्तरण कार्यक्रममा बोल्दै नगर प्रमुख रेग्मीले शिक्षा क्षेत्रलाई नगरपालिकाले उच्च प्राथमिकतामा राखेको जानकारी दिनुभयो । भौतिक पूर्वाधार, यातायातको व्यवस्थापनले विद्यार्थीहरुको शैक्षिक स्तर बढ्ने अपेक्षा रहेको उहाँले बताउनुभयो । नगरप्रमुख रेग्मीले अभिभावक, विद्यार्थी र जनप्रतिनिधिहरुको चाहना अनुसार बस हस्तान्तरण गरिएको जानकारी दिनुभयो । न्यूनतम शुल्क लिएर दिगो रुपमा बस संचालनका लागि ध्यान दिन व्यवस्थापन समितिलाई सुझाव दिनुभयो । सस्तो लोकप्रियताका लागि निशुल्क बस सेवा संचालनगछौं भन्ने होइन, चालक, सहचालक, इन्धनको खर्च जुटाउनका लागि बेग्लै कार्य विधि बनाएर अगाडी बढ्न व्यवस्थापन समितिलाई आग्रह गर्नुभयो । नगरक्षेत्रभित्रका सामुदायिक विद्यालयहरुमा अहिले सम्म २१ करोडबढी रकम खर्च गरिएको सामाजिक विकास समितिका संयोजक मकरमान श्रेष्ठले जानकारी दिनुभयो । उहाँका अनुसार विद्यालयहरुको भौतिक पूर्वाधार निर्माणदेखि स्कुल बस, लाइबेरी व्यवस्थापन, ल्याब निर्माण लगायतका क्षेत्रमा नगरपालिकाले लगानी गरेको हो । यस आर्थिक वर्षमा मात्रै ३ करोडबढी बजेट विनियोजन गरिएको उहाँले जानकारी दिनुभयो । प्रदेश संघ गरी २१ करोड ४० लाख बजेट छुट्टाएको छ उहाँले भन्नुभयो । यतिधेरै लगानीकाबीचपनि नगरपालिका भित्रका सामुदायिक विद्यालयहरुमा अनगिन्ती समस्या रहेको उहाँले बताउनुभयो । वडा नं. ४ का वडा अध्यक्ष समेत रहनुभएका सामाजिक विकास समितिका संयोजक श्रेष्ठले प्राथमिकताका आधारमा एकपछि अर्को समस्या सामाधानगर्दै जाने स्पष्टपार्नुभयो । बस हस्तान्तरण कार्यक्रममा कार्यक्रममा वडा नं. ६ का वडा अध्यक्ष, टिकाराम रेग्मी, जमुनापुर माध्यमिक विद्यालयकी प्रधानाध्यापक गीता न्यौपाने, माध्यमिक विद्यालय रेडक्रसग्रामका विद्यालय व्यवस्थापन समिति अध्यक्ष तुलवहादुर वि.क लगायतले बोल्नूभएको थियो । कार्यक्रम नगरपालिकाको उपप्रमुख विमला तमाङ, प्रमुख प्रशासकीय अधिकृत केशव प्रसाद उपाध्याय, वडा नं. १ का वडा अध्यक्ष शन्तवीर स्याङतान, वडा नं. ५ का वडा अध्यक्ष दीपकवहादुर भट्टराई, वडा नं.७ का वडा अध्यक्ष कमलराज मोक्तान लगायतको उपस्थिती रहेको थियो । कालिका नगरपालिकामा ३५ वटा सामुदायिक विद्यालयहरु छन् । यस अघिपनि भीमोदय नमुना माध्यमिक विद्यालय, शमीपुर विद्यालय, चर्तुमुखी माध्यमिक विद्यालयलाई नगरपालिकाले बस हस्तान्तरण गरिसकेको छ l