नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले नेपाल कृषि प्रधान देश भएकाले नै नाकाबन्दीले गलाउन नसकेको बताएका छन् । राष्ट्रिय धान दिवस मनाउन पत्नी राधिका शाक्यसँगै चितवन आएका ओलीले पाँच महिनाको नाकाबन्दीमा पनि नेपाल टिकिरहनुको कारण कृषि नै भएको बताए ।

‘हामीलाई पाँच महिना नाकाबन्दी लाग्यो । पाँच महिना नाकाबन्दी लाग्दा पनि नेपाल किन टिक्यो भने यो कृषि प्रधान देश हो । कृषि प्रधान देश भएको हुनाले नाकाबन्दी जस्तो चिजमा पनि.. । हामी प्राय बाहिरबाट सबै चिज ल्याउँछौँ तर हामीलाई खान पुग्ने अन्न, सब्जी, माछा, मासु, दूध यहि उत्पादन हुन्छ । त्यसो हुनाले नाकाबन्दीले पनि हामीलाई गलाउन सकेन’, उनले भने ।

उत्पादनलाई प्रविधिसँग जोड्न जरुरी रहेको भन्दै उनले राष्ट्रिय अन्न धानको उत्पादन गुणात्मक किसिमले बृद्धि गर्नुपर्ने बताए । नेपालको ६० प्रतिशत भन्दा बढी जनसंख्या अहिले पनि कृषिमा आधारित रहेको उनले बताए । ‘कृषि उत्पादनलाई तीव्र गतिमा बढाउन आवश्यक छ । चितवन उर्वर जिल्ला हो । विकसित जिल्ला पनि हो । यहाँहरुसँगै धान उत्सव मनाउने र धान रोप्ने र यसको सन्देश देशभर नै दिने भनेर म आएको हुँ । कृषिको आधुनिकीकरण र व्यवसायीकरण गर्न जरुरी छ’, उनले भने ।

नेपाल कृषिमा आत्मनिर्भर भयो भने अरु क्षेत्रमा आफै आत्मनिर्भर हुने उनले दाबी गरे ।