भरतपुर । चितवनका ६ पालिकाको नगरसभा आइतबार सम्पन्न भएको छ । राप्ती नगरपालिकाबाहेक अन्य चितवनका ६ पालिकाले नगरसभामार्फत बजेट सार्वजनिक गरेका हुन् ।

चितवनका ६ पालिकाले १० अर्ब बढीको बजेट सार्वजनिक गरेका छन् । सबैभन्दा बढी बजेट भरतपुर महानगरपालिकाले सार्वजनिक गरेको छ । भरतपुर महानगरपालिकाले आगामी आर्थिक वर्ष २०८०/८१ का लागि ६ अर्ब ३१ करोड ७९ लाख ९० हजारको बजेट सार्वजनिक गरेको छ । भरतपुर महानगरपालिकाले आगामी आर्थिक वर्षका लागि अघिल्लो आर्थिक वर्षभन्दा १० करोड ७० लाख १७ हजार रूपैयाँ बजेट बढाएको छ ।

रत्ननगर नगरपालिकाले १ अर्ब ३३ करोड ७२ लाख ७३ हजारको बजेट प्रस्तुत गरेको छ । आइतबार भएको नगरसभामार्फत रत्ननगर नगरपालिकाले सबै क्षेत्रलाई केही न केही रकम पर्ने गरी बजेट ल्याएको हो । रत्ननगर नगरपालिकाले २०७९/८० का लागि १ अर्ब ३७ करोड ९८ लाख बजेट विनियोजन गरेको थियो । रत्ननगर नगरपालिकाको गत वर्षको तुलनामा झन्डै ३ करोड बजेट घटेको छ ।

चितवनको खैरहनी नगरपालिकाले आगामी आर्थिक वर्ष २०८०/८१ का लागि ९४ करोड ८८ लाख ९५ हजारको बजेट सार्वजनिक गरेको छ । खैरहनी नगरपालिकाको १३औँ नगरसभामा नगर उपप्रमुख कविता उप्रेतीले बजेट सार्वजनिक गरेकी हुन् । चितवनको खैरहनी नगरपालिकाले आगामी आर्थिक वर्ष २०७९/८० का लागि १ अर्ब बढीको बजेट ल्याएको छ । खैरहनी नगरपालिकामा गत वर्ष १ अर्ब १ करोड १२ लाख ५१ हजारको बजेट ल्याएको थियो । खैरहनी नगरपालिकाको पनि यसपटक ६ करोडभन्दा बढी बजेट घटेको छ ।

चितवनको इच्छाकामना गाउँपालिकाले आर्थिक वर्ष २०८०/८१ को अनुमानित बजेट सार्वजनिक गरेको छ । गाउँपालिका उपाध्यक्ष माया सिलवालले १३औँ गाउँसभामा सार्वजनिक गरेको इच्छाकामनाको बजेट ६७ करोड ७ लाख ७० हजार ८४६ रूपैयाँ रहेको छ । इच्छाकामना गाउँपालिकाको गत आर्थिक वर्षको बजेट ६७ करोड ४४ लाख ३५ हजार रहेको थियो ।
माडी नगरपालिकाले आगामी आर्थिक वर्ष २०८०/०८१ का लागि ९६ करोड ६९ लाख २ हजार ४२७ रूपैयाँ बजेटसहितको नीति तथा कार्यक्रम पारित गरेको छ । माडी नगरपालिकाको ११औँ नगरसभामा नगर उपप्रमुख खेमप्रसाद महतोले बजेट सार्वजनिक गरेका हुन् ।

माडी नगरपालिकाले गत वर्ष २०७९/८० का लागि १ अर्ब ७ करोड ८० लाख ८२ हजार ७० हजार रूपैयाँको बजेट ल्याएको थियो । त्यतिबेला नगर उपप्रमुख खेमप्रसाद महतोले चालूतर्फ ४१ करोड ५० लाख र पुँजीगततर्फ ६५ करोड ४८ लाख १६ हजार विनियोजन रहेको बजेट सार्वजनिक गरेका थिए । अहिले माडीको बजेट पनि घटेर आएको छ ।

कालिका नगरपालिकाले आर्थिक वर्ष २०८० र ८१ का लागि ८१ करोड ७७ लाख ८० हजार बजेट सार्वजनिक गरेको छ । नगरको जारी नगरसभामा उपमेयर विमला तामाङले उक्त बजेट सार्वजनिक गरेकी हुन् । कालिका नगरपालिकाले गत वर्ष २०७९ र ८० का लागि ८५ करोड ९७ लाख ५१ हजार रूपैयाँको बजेट ल्याएको थियो । संघीय सरकारबाट नै बजेटको सिलिङ घटेर आए पनि चितवनका पालिकाको पनि बजेट घटेको नगरप्रमुखहरुको भनाइ छ ।