चितवन । पोल्ट्री व्यवसायी एवम् नेपाली कांग्रेसका नेता शंकर कँडेललाई आत्महत्या गर्न दुरुत्साहन गर्नेलाइ पक्राउ गर्न माग गर्दै चितवनमा गरिएको आन्दोलन अराजकतातर्फ जान थालेको छ । आत्महत्या दुरुत्साहनको आरोपमा प्रहरीले जीवन रावललाई पक्राउ गरिसकेको छ ।
आत्महत्या गर्न दुरुत्साहन गरेका मुख्य योजनाकार प्रदिप रुङ्गटालाई अझै पक्राउ नगरेको भन्दै चितवन कांग्रेसले आज जिल्ला प्रशासन कार्यालय घेराउ गरेको थियो । घेराउपछि प्रमुख जिल्ला अधिकारी सुरेन्द्र पौडेलमार्फत गृहमन्त्रीलाई ज्ञापनपत्र बुझाएका नेपाली कांग्रेस चितवनका सभापति राजेश्वर खनालले आजको कार्यक्रम स्थगित भएको र भोलि पुनः आन्दोलन गर्ने बताए ।
कांग्रेसका कार्यकर्ताले भने जिल्ला सभापतिको कुरामा असहमति जनाए । उनीहरुले केन्द्रिय बसपार्क चोक र हाकिम चोकमा टायर बालेर पूर्व–पश्चिम राजमार्ग अवरुद्ध गरे । मोटरसाइकलमा सवार विरामी यात्रु र तिनका आफन्तलाई कांग्रेस कार्यकर्ताले कुटपिट गरे । अत्यावश्यक परेर हिँडेका यात्रुलाई पनि उनीहरुले सातो काडे ।
पार्टी निर्णयमा नै असन्तुष्टि जनाएका कार्यकर्ताले दिनभर राजमार्ग अवरुद्ध गर्नुपर्ने भन्दै आन्दोलन गरेका हुन् । प्रजिअ पौडेल र चितवन प्रहरी प्रमुख रामेश्वर कार्कीले आत्महत्या दुरुत्साहनको मुख्य योजनाकारलाई पक्राउ गर्न नसकेको भन्दै दबाब दिन आन्दोलन गर्नुपरेको कांग्रसका कार्यकर्ताले बताएका छन् ।