चितवन । जिल्ला युवा समिति चितवनको आयोजनामा माडीका किशोरीहरुलाई आत्मरक्षा सम्बन्धी तालिम सुरु भएको छ ।
किशोरीहरुमा आत्मबल र आत्मविश्वास बढाउन तथा दुव्र्यवहारजन्य घटना भए प्रतिकार गरी सुरक्षित हुन सिकाउने उद्देश्यले समितिले माडी-९, कृष्णनगरस्थित कृष्णनगर माध्यमिक विद्यालयका छात्राहरुलाई आत्मरक्षा सम्बन्धी दुईदिने तालिम दिन सुरु गरेको हो ।

तालिममा सो विद्यालयमा ८ देखि १० कक्षामा अध्ययनरत ४० जना छात्राहरुको सहभागिता रहेको जिल्ला युवा समिति चितवनका अध्यक्ष रामचन्द्र लम्सालले जानकारी दिनुभयो ।

जीवनमा आइपर्ने कुनै पनि किसिमको चुनौती र खतराको बेला छात्राहरुले आफ्नो रक्षा आफै गर्न सक्षम गराउने उद्देश्यले तालिमको व्यवस्था गरिएको अध्यक्ष लम्सालको भनाइ छ ।

कार्यक्रमको प्रमुख अतिथि रही तालिम समुद्घाटन गर्दै माडीका नगरप्रमुख ताराकुमारी काजी महतोले छात्राहरुलाई शारीरिक एवं मानसिक रुपले बलियो बनाउन सो तालिमले महत्वपूणर् भूमिका निर्वाह गर्ने विश्वास व्यक्त गर्नुभयो ।

कार्यक्रमका विशिष्ट अतिथि रहनुभएका वडाध्यक्ष घनश्याम दवाडीले महिलाहरुलाई कमजोर ठान्ने प्रवृत्तिलाई परिवर्तन गर्न उनीहरु आत्मविश्वासी हुनु अत्यावश्यक रहेको भन्दै सो तालिमले उनीहरुलाई आत्मविश्वासी बनाउँदै आत्मरक्षा गराउन मद्दत गर्ने बताउनुभयो ।

चितवन जिल्लामा एक स्थानमा मात्रै सञ्चालित सो तालिममा प्रशिक्षकहरु सीता श्रेष्ठ र भिमा बस्नेतले छात्राहरुलाई आत्मरक्षाको कलाहरु सिकाउनुभएको छ । कार्यक्रम जिल्ला युवा समिति चितवनका अध्यक्ष रामचन्द्र लम्सालको अध्यक्षतामा सञ्चालन भएको हो ।