रत्ननगर । रत्ननगर–१, बकुलहरमा सञ्चालित सेभ सुपरमार्केटले प्रथम वार्षिकोत्सव मनाएको छ ।

कार्यक्रममा रत्ननगर नगरपालिका वडा नं १ का वडाध्यक्ष कुलप्रसाद सापकोटाले सेभ सुपरमार्केटले ग्राहकमैत्री वातावरणमा छूटसहितको सेवा प्रदान गरिरहेको बताउँदै ग्राहकको मागबमोजिम अगाडि बढ्न आग्रह गरे । पुरानो ज्योतिहलमा अवस्थित सुपरमार्केटमा सिनेमा हलसहितको सुविधा प्रदान गर्न सकिए ग्राहकको आकर्षण अझै बढ्ने उनको भनाइ थियो ।

प्रथम वार्षिकोत्सवको केक काटेर खुसियाली मनाउँदै सेभ सुपरमार्केटका अध्यक्ष नारायण भट्टराईले सेभ सुपरमार्केटमा कमिकमजोरीहरुलाई सुधार गर्दै पूर्वी चितवनको हब बनाउन आफूहरु लागिपरेको बताउँदै दोस्रो वार्षिकोत्सवमा सिनेमा हलसहितको सुविधा प्रदान गर्ने प्रतिबद्धता व्यक्त गरे । सिनेमा हलको लागि दीपक भट्टराईको संयोजकत्वमा समितिसमेत गठन गरिएको उनले बताए ।

सञ्चालक सुमन घिमिरेले स्वागत मन्तव्य व्यक्त गरेको कार्यक्रममा सञ्चालक दीपेन्द्र खतिवडाले कार्यक्रम सञ्चालन गरेका थिए । सो अवसरमा सेभ सुपरमार्केटका कर्मचारी नरेश देवकोटालाई उत्कृष्ट कर्मचारीका रुपमा पाँचहजार नगदसहित सम्मान गरिएको थियो । कार्यक्रममा सिइओ दिनेश घिमिरेलगायत सञ्चालकहरुको सहभागिता रहेको थियो ।