रत्ननगर । पूर्वी चितवनको रत्ननगरका एक जना किसानको खेतमा लगाएको मकैमा दाना नलागेपछि घाँसको मुल्यमा ढोड विक्री गर्न बाध्य भएका छन् ।

रत्ननगर वडा नं १२ का जिरौनाका किसान अर्जुन पौडेलले एक विघा क्षेत्रफलमा लगाएको मकैमा दाना नलागेपछि घाँसको मुल्यमा विक्री गर्न बाध्य भएका हुन । तयारी हरियो घोगा बेच्ने योजनाका साथ पौडेलले माघ ५ गते मकै रोपेका थिए । रोपेको करिब चार महिनामा बैशाख अन्तिम साता उनले हरियो घोगा बेच्ने उद्देश्य लिएका थिए । सौराहाचोकमा रहेको साझा एग्रोभेटबाट पौडेलले सीपी ८०८ जातको हाइब्रेड मकै खरिद गरेर रोपेका थिए ।

हरियो घोगा बेच्ने समय हुँदा पनि दाना नलागेपछि घाँसको मुल्यमा ढोड विक्री गर्न बाध्य भएको किसान पौडेलले बताए । ढोड बेचेका उनले एक विघामा लगाएको कमै खेतीबाट ५० प्रतिशत घाटा व्यहोरेका छन् । खेती लगाउन करिब ७० हजार खर्च भएको छ उनले भने ढोड त्यतिनै मुल्यमा विक्री भयो । हरियो घोगा बेचेर उनले एक खेतीबाट करिब दुई लाख आम्दानी गर्ने लक्ष्य राखेका थिए ।

किसान पौडेलले लगानी उठेपनि आम्दानी लिन नसकेको बताए । मिहिनेत र परिश्रम खेर गयो पौडेलले भने खेती गरेर आम्दानी गर्ने सपना पुरा हुन सकेन् । पौडेलले केरा खेती मासेर माघमा मकै रोपेका थिए । राम्रो आम्दानी भयो भने व्यवसायिक रुपमै मकै खेती गर्ने योजनाका साथ हाइब्रेड मकै रोपेको भन्दै उनले पहिले खेतीले नै आफुलाई निरास बनाएको बताए ।

रत्ननगर नगरपालिका कृषि शाखा प्रमुख प्रविण लामाले सीपी ८०८ जातको मकै तराईका जिल्लाहरुका लागि सिफारिस गरिएको जात भएको बताए । बढ्दो गर्मीका कारण भालेकर्णको मृत्यु भइ मकैको बोटमा दाना नलागेको हुन सक्ने लामाले बताए । यो अनुसन्धानको विषय बन्यो उनले भने किसान पौडेलले अनुसन्धन गरेर मात्र मकै बेच्नु पर्ने थियो, तर ढोड काटिसकेको भन्ने जानकारी हामीले पाएका छौं ।