भरतपुर । निरन्तर उत्कृष्ट नतिजाका कारण सबैको रोजाइमा पर्ने गरेको विद्यालय हो, भरतपुरस्थित नारायणी नमुना मावि । यस स्कुलमा पढ्ने र पढाउने धेरैको चाहनाको विषय बन्ने गरेको छ ।

मंगलबार भएको प्रवेश परीक्षामा यस स्कुलमा दुई हजार ८०० जनाले परीक्षा दिएका छन् । कक्षा १ देखि ९ सम्म जम्मा ३५० जना माग भएको छ । भर्ना हुनका लागि चाहने अधिकांश विद्यार्थी निजी विद्यालयबाट आएकाहरु छन् । केही छिमेकी सरकारी विद्यालयका र केही भरतपुरभन्दाबाहिर तथा चितवन जिल्लाबाहिरका रहेका विद्यालयले जनाएको छ ।

घरनजिकैको विद्यालयमा पढिरहेको छोरालाई सदरमुकामको सरकारी विद्यालय राम्रो लागेपछि इच्छाकामना–३ का रामप्रसाद अधिकारीले प्रवेश परीक्षामा सहभागी गराए । गाउँमा रहेका विद्यालयहरुको तुलनामा यहाँको पढाइ राम्रो लागेको र यस विद्यालयमा पढेका गाउँका भाइबहिनीहरु अहिले मेडिकल, इन्जिनियरिङ क्षेत्रमा छात्रवृत्तिमा पढिरहेकाले आफू पनि आकर्षित भएको अधिकारी बताउँछन् ।

हालै सम्पन्न एसइईमा यस विद्यालयका ३८४ जना विद्यार्थी सहभागी छन् । गत वर्ष एसइईमा नेपाल टप भएको थियो । ‘शैक्षिक गुणस्तरीयताका कारण सामुदायिक विद्यालयहरुमा विद्यार्थीको चाप बढको छ’, यसै विद्यालयका निवर्तमान प्रअ पूर्णप्रसाद दवाडीले भने, ‘विद्यार्थी र अभिभावक सरकारी विद्यालय रोज्दै आउनु खुसीको कुरा हो ।’

निर्धारित कोटाभन्दा धेरैले आवेदन दिएकाले सबैलाई भर्ना लिन असमर्थ रहेको विद्यालयका शिक्षकहरुको प्रतिक्रिया छ । विद्यालयको वार्षिक नतिजा उत्कृष्ट रहेको, विज्ञान विषयको अध्यापन हुने गरेको, अंग्रेजी माध्यममा पढाइ हुने गरेकोलगायतका कारणले विद्यार्थी आफ्नो विद्यालयमा पढ्न चाहेको दवाडीले बताए ।

आफ्ना नानीबाबुलाई नारायणी माविमा भर्ना गर्न पाउनुलाई कतिपय अभिभावकले ठूलै उपलब्धि हासिल गरेजस्तो गर्छन् । ‘अभिभावकको बारम्बार फोनका कारण मोबाइल नै अफ गरेर बस्नु परेको छ’, निवर्तमान प्रअ दवाडीले भने, ‘निष्पक्ष परीक्षा प्रणाली र नतिजाका आधारमा नयाँ भर्ना लिने तयारीमा छौँ ।’

सामुदायिक विद्यालयहरुको सबलीकरण, स्कुल बस सञ्चालन, पर्याप्त सिकाइ सामग्री पनि विद्यार्थी चापका कारण रहेको भरतपुर महानगर शैक्षिक महाशाखा प्रमुख महेन्द्रप्रसाद पौडेलले बताए । छात्रवृत्तिसम्बन्धी सुविधा लिनका लागि यसअघि ८ कक्षाबाट पढेको हुनुपर्नेमा ६ कक्षादेखि नै सामुदायिक विद्यालय पढेको हुनुपर्ने छात्रवृत्तिसम्बन्धी नयाँ नीतिका कारण आधारभूत तहमा विद्यार्थीको चाप बढिरहेको महाशाखा प्रमुख पौडेलले बताए ।

३प्रवेश परीक्षा दिनका लागि विद्यालय पुग्नेको भीड ।