भरतपुर । चितवन क्षेत्र नं।२ मा हुन लागेको उपनिर्वाचनका लागी ६९० जना कर्मचारीहरु मतदान केन्द्रमा खटिँदै छन् ।
चितवन–२ मा ४३ मतदानस्थल र १३८ वटा मतदान केन्द्र रहेका छन् । एउटा मतदानस्थलमा आठवटासम्म मतदान केन्द्र रहेको छन् । प्रायः विद्यालयलाई नै मतदानस्थलका रुपमा प्रयोग गर्ने गरिएको छ । मतदान केन्द्रमा ६९० जना कर्मचारी खटिने सहायक निर्वाचन अधिकृत ईश्वर आचार्यले बताए ।
मुख्य निर्वाचन अधिकृतको कार्यालयले आजदेखि निर्वाचन सामग्री वितरण गर्दैछ । मतदान केन्द्रमा खटिएका कर्मचारी र सुरक्षाकर्मीले निर्वाचन सामग्री लिएर सम्बन्धित केन्द्रमा जाने सहायक निर्वाचन अधिकृत आचार्यले जानकारी दिए । ‘बिहीबार र शुक्रबार गरेर कर्मचारीले निर्वाचन सामग्री लैजानुहुन्छ । उहाँहरु सम्बन्धित मतदान केन्द्रमा पुगेपछि स्थानीय दलका प्रतिनिधिसँग समन्वय गरेर सर्वदलीय बैठक राख्नुहुनेछ’, उनले भने ।