चितवन, चैत ३०(

चितवनमा पछिल्लो केही दिन गर्मी बढेको छ ।

चैत महिना लागेसँगै गर्मी बढेपनि पछिल्लो केही दिन यता अत्यधिक गर्मी बढेको हो ।

भरतपुर एयरपोर्टमा रेकड भएको तथ्यांक अनुसार आज जिल्लाको अधिकतम तापक्रम ३६ डिग्री सेल्सियस रहेको छ भने न्यून तापक्रम २० डिग्री सेल्सियस रहेको छ । तर, चैत महिनाभर चितवनको अधिकतम तापक्रम ३६ डिग्री सेल्सियस सम्म पुगेको छ । जुन जाडो महिना सकिएर गर्मी सुरुभएपछिको चितवनको अधिकतम तापक्रम हो । हरेक दिन गर्मी बढ्दै गएको देखिन्छ । बुधबार न्यूनतम तापक्रम १९ डिग्री र अधिकतम् तापक्रम ३५ डिग्री रहेकोमा आज बढेर न्यूनतम २० र अधिकतम् ३६ डिग्री पुगेको हो ।

त्यस्तै जाडो सकिएर एक्कासी गर्मी सुरुभएपछि स्वास्थ्यमा विभिन्न समस्या देखापर्ने भरतपुर अस्पतालका बरिष्ठ फिजिसिएन डा प्रमोद पौडेलले बताए । उनका अनुसार गर्मी मौसममा कमजोरी, मृगौलामा समस्या, पानी कम हुने, हैजा, टाइफाइड, घाम र धूलोमा हिड्दा दम जस्ता समस्या देखिने गर्छन् । त्यसैगरी यस समयमा सर्पदंश र लामखुट्टेबाट फैलने रोगहरुको समस्या देखिने डा पौडेलले बताए । यस समयमा कोरोना पनि फैलने उनको भनाइ छ । डा पौडेलले यसबाट बच्नको लागि घाममा नहिड्ने, झोलिलो खानेकुराहरु प्रशस्त खानको लागि सल्लाह दिएका छन् । उनले भरतपुर अस्पतालमा गर्मी सुरु भएसँगै रुघाखोकी र ज्वरोको बिरामी बढ्न थालेको जानकारी दिए ।

जिल्ला स्वास्थ्य कार्यालय चितवनकी जनस्वास्थ्य अधिकृत गिताञ्जली ढकालका अनुसार पछिल्लो समय जिल्लामा कोरोनाको मात्रै जोखिम भए पनि अब गर्मी सुरु भएसँगै अन्य विभिन्न रोगहरु पनि देखा पर्दै जान्छ । जसबाट बच्न विभिन्न सतर्कता अपनाउनुपर्ने उनको भनाइ छ ।
उनी भन्छिन्, ‘यसरी एक्कासी गर्मी बढ्दै जाँदा खान मन नलाग्ने, टाउको दुख्ने, ज्यानमा पानीको मात्रा कम हुने, पखाला लाग्ने, रुघा खोकी लाग्ने, ज्वरो आउनेलगायत विभिन्न समस्या देखिन्छ । ’ यसरी स्वास्थ्यमा देखिने विभिन्न समस्याबाट बच्न कोल्ड ड्रिङ्स नभएर धेरै मात्रामा सुद्ध पानी पिउनुपर्ने, हरियो सागपात, तरल पदार्थ, प्रोटिन तथा भिटामिनयुक्त खाना, फलफूल, फलफूल जुस खानुपर्ने उनको सुझाव छ । अब क्रमशः गर्मी बढ्दै जाने भएकोले जिल्लामा डेँगु, मलेरियालगायतका रोगको पनि जोखिम रहेको उनी बताउँछन् ।

स्वास्थ्य कार्यालय चितवनको डाटामा उल्लेख भए अनुसार जिल्लामा २०७९ साउन १ गतेदेखि फागुन ५ गतेसम्म तीन हजार ३१० जनामा डेँगु संक्रमण पुष्टि भएको छ । जसमध्ये ६ जनाले ज्यान गुमाएका छन् । यस्तै आज बिहीबारको तथ्यांक अनुसार जिल्लामा २ नयाँ कोरोना संक्रमित थपिएका छन् भने ११ जना घरमा आइसोलेसनमा रहेका छन् ।