चितवन । एएचएफ नेपालले एचआईभी संक्रमितको उपचारलाई निरन्तरता दिने भएको छ । एचआईभीको रोकथाम, उपचार र सचेतना बृद्धि गर्ने कामलाई एएचएफ नेपालले सन् २०२७ सम्म निरन्तरता दिने भएको हो । एएचएफ नेपालले भरतपुर अस्पतालको एआरटी सेन्टरमार्फत एचआईभी संक्रमितको उपचार गर्दै आएको छ ।

सेवालाई सन् २०२७ सम्म निरन्तरता दिन तीन करोड ८० लाख रुपैयाँ आर्थिक सहायता प्राप्त भएको एएचएफ नेपाल बागमती प्रदेशका वरिष्ठ कार्यक्रम संयोजक कृष्णहरी सापकोटाले जानकारी दिए । एआरटी सेन्टरबाट ११ सय ५१ जना एचआईभी संक्रमितले नियमित रुपमा एआरटी औषधी खाइरहेको उनले बताए । नियमित एआरटी खानेमा ५६६ जना पुरुष, ५४७ जना महिला र २८ जना बालबालिका रहेका छन् ।

स्वास्थ्य कार्यालय चितवनका प्रमुख दुर्गा सापकोटाले एचआईभी संक्रमितको उपचार प्रभावकारी भएको बताए । भरतपुर अस्पतालका मेसु प्राडा कृष्णप्रसाद पौडेलले एचआईभी संक्रमितको उपचार पनि सरकारी अस्पतालभित्रै पाउँदा विरामीलाई सहज भएको भन्दै उपचारमा विरामीको पहुँच बढेको बताए ।