रत्ननगर । पूर्वी चितवनको कालिका नगरपालिका वडा नं ७ ले वडा भित्रका ज्येष्ठ नागरिकलाई सम्मान सहित स्वास्थ्य परीक्षण तथा औषधि वितरण गरेको छ । शुक्रवार वडा कार्यालयमा आयोजित कार्यक्रममा वडा भित्रका १६३ जना ज्येष्ठ नागरिकलाई सम्मान गरिएको हो ।

कार्यक्रमका प्रमुख अतिथि मेयर विनोद रेग्मी, वडाध्यक्ष कमलराज मोक्तान र प्रमुख प्रशासकीय अधिकृत केशबप्रसाद उपाध्यायले ज्येष्ठ नागरिकलाई दोसल्ला ओढाएर सम्मान गरेका थिए । कार्यक्रममा ज्येष्ठ नागरिकलाई सम्मान सहित पौष्ट्रिक आहार र छाता समेत प्रदान गरिएको थियो । सो अबसरमा मेयर रेग्मीले ज्येष्ठ नागरिक माथी हुने हिंसा सहन नसकिने बताए । ज्येष्ठ नागरिक नगरका सम्पती हुन उनले भने उहाँहरु माथी हुने हिंसा हामी सहन सक्दैनौं ।

मेयर रेग्मीले ज्येष्ठ नागरिकले समाज, वडा र नगर निर्माणमा खेलेको भूमिकाको कदर गर्दै सम्मान गरिएको बताए । समाजमा सम्पती खाने बुवाआमालाई नहेर्ने प्रबृति बढ्दै गएको भन्दै उनले यस्तो अमानवीय क्रियाकलाप नगर्न आग्रह गरे । वडाध्यक्ष मोक्तानले ७५ बर्ष माथीका ज्येष्ठ नागरिकको पहिचान गरी सम्मान,पौष्ट्रिक आहार वितरण र स्वास्थ्य परीक्षण गरी औषधि वितरण गरिएको बताए ।

ज्येष्ठ नागरिकको स्वास्थ्य परीक्षण गरी आयुर्वेदिक औषधि समेत वितरण गरिएको उनको भनाई छ । कार्यक्रममा वडा सदस्यहरु महेश श्रेष्ठ, सन्तमान सिंजाली मगर,शर्मिला अधिकारी र सानु नेपाली लगायतको सहभागिता रहेको थियो ।