रत्ननगर। रत्ननगर नगरपालिका स्वास्थ्य शाखाको आयोजनामा समुदायमा स्वास्थ्यकर्मी कार्यक्रम बुधबार नगर स्वास्थ्य केन्द्र जिरौनामा सम्पन्न भएको छ ।

समुदायमा स्वास्थ्यकर्मीका लागि नसर्ने रोग अर्थात मुटु , क्यान्सर , मिर्गौला , दम र मधुमेह रोगसम्बन्धी जनचेतना जगाउन सो कार्यकम आयोजना गरिएको हो ।

रत्नगरका १६ वटै वडाका सबै टोलमा दुई चरणमा यो कार्यक्रम सञ्चालन गर्न लागिएको स्वास्थ्य शाखा प्रमुख एवं जनस्वास्थ्य अधिकृत माधव पौडेलले जानकारी दिए ।

रत्ननगर नगरपालिकाका प्रमुख प्रशासकीय अधिकृत छविलाल सुवेदीले नगरवासीलाई निरोगी बनाउन रत्ननगर नगरपालिका लागिपरेको बताउँदै दीर्घरोगी एवं नसर्ने रोगका बिरामीको पहिचान गरी मासिक पाँचहजार रुपैयाँ उपचार खर्चको व्यवस्था गरिएको बताए ।

विपन्न वर्गका नागरिकहरु उपचार खर्चको अभावमा रोग लुकाएर हिँड्न नपरोस भनेर ३२ सय परिवारको निःशुल्क स्वास्थ्य बिमा गराई उपचारको पहुँचमा ल्याइएको बताए । जन(स्वास्थ्यलाई विशेष महत्त्व दिँदै विभिन्न क्षमता विकास कार्यकम सञ्चालन गरिँदै आएको उनको भनाइ थियो।

नगर रत्ननगर ११ का वडाध्यक्ष श्याम श्रेष्ठको अध्यक्षतामा सम्पन्न कार्यक्रम नगर स्वास्थ्य केन्द्र जिरौनाका केन्द्र प्रमुख दुर्गा श्रेष्ठले सञ्चालन गरेकी थिइन् ।