काठमाडौै, चैत २२–

दुई महिने ग्रासरुट अभियानले चितवन क्षेत्र नम्बर २ मा राष्ट्रिय स्वतन्त्र पार्टीको मत घट्दै गएको निष्कर्ष नेकपा एमालेले निकालेको छ। वैशाख १० गते हुन लागेको उपनिर्वाचनका लागि एमालेले जिल्ला अध्यक्ष रामप्रसाद न्यौपानेलाई अघि सारेको छ।

रास्वपा सभापति रवि लामिछानेसँग चुनावी प्रतिस्पर्धाका लागि युवा नेता न्यौपानेलाई अघि सारेको एमालेले अभियानले साधारण, सांगठनिक सदस्य र शुभेच्छुकको संख्या बढेको निष्कर्ष निकालेको हो।

मंसिर ४ को चुनावमा केही नयाँ हुने आशमा रविको पक्षमा लागेका एमालेका सदस्यसमेतको ठूलो पंक्तिलाई ग्रासरुट अभियानले फेरि फर्किएको स्थानीय नेताहरु बताउँछन्। ४ मंसिरको चुनावमा कांग्रेसका उमेश श्रेष्ठ र एमालेका कृष्णभक्त पोखरेलकोभन्दा तेब्बर बढी मत ल्याएर रास्वपा सभापति लामिछाने निर्वाचित भएका थिए।

लामिछानेले ४९ हजार ३०० मत ल्याएर निर्वाचित हुँदा कांग्रेसका श्रेष्ठले १४ हजार ९८८ र एमालेका पोखरेलले १४ हजार ६५२ ल्याएका थिए। त्यसबेला एमालेमा रहेर पनि रविलाई मत दिएका ५० प्रतिशतमध्ये ३० प्रतिशत फर्किएको हिसाब चितवन कार्यालयमा बुझाइएको छ।

खारेज भइसकेको नागरिकता प्रयोग प्रकरणले रविले सांसद र मन्त्री सबै पद गत माघ १३ गते गुमाएपछि त्यस क्षेत्रमा उपनिर्वाचन हुँदैछ। रविले पाँच महिनाअघि पाएको मत उपनिर्वाचनसम्म पुग्दा निकै घट्ने कांग्रेस–एमाले नेताहरुको विश्लेषण छ।

यद्यपि अझै चुनाव जित्नेगरी माहोल बनिनसकेको भन्दै केन्द्रीय नेताहरु चितवन केन्द्रित हुँदैछन्। एमालेका स्थायी कमिटी सदस्य देवी ज्ञवाली र काशीनाथ अधिकारी तथा पोलिटब्युरो सदस्य गोकुल बास्कोटा खटिएका छन्।

बास्कोटाले अहिलेसम्म क्षेत्र नम्बर २ मा पर्ने भरतपुर महानगरका दशवटै वडा पुगेर एकचरण मतदाता भेटिसकेका छन्। उनको घरदैलो अभियानले रविको पक्षमा लागेका नेता–कार्यकर्ता एमालेमै क्रियाशील हुन थालेको दाबी नेताहरुको छ।

अहिलेसम्म ३० प्रतिशत फर्किसकेको एमाले स्थायी कमिटी सदस्य तथा बागमती प्रदेश कमिटी इन्चार्ज काशीनाथ अधिकारीले दाबी गरे। उपचुनावका लागि रास्वपाबाट रवि उम्मेदवार छन्। कांग्रेसले निवर्तमान सभापति जितनारायण श्रेष्ठ र एमालेले जिल्ला अध्यक्ष रामप्रसाद न्यौपानेलाई उम्मेदवार बनाएको छ।

रास्वपा सभापति रविले जित्नेगरी सांगठनिक मत नभएकोले विगतमा पाएको मत यताउता भइसकेको उनको दाबी छ। ‘विगतमा उम्मेदवारी चयनप्रति असन्तुष्टहरुले विकल्पका रुपमा रविजीलाई मत हाल्नुभएको हो,’ अधिकारीले भने, ‘अहिले साथीहरु आफ्नै पार्टीमा फर्किनुभएको छ।’

एमालेले जिल्ला अध्यक्ष एवम् युवा नेता न्यौपानेलाई उम्मेदवार बनाएकोले पहिलाभन्दा माहोल बढेको उनले बताए। ‘जित–हारका विषयमा अहिले नै भन्न सकिँदैन,’ उनले थपे, ‘एमालेको पुरानो विरासत फर्किने अवस्था देखिएको छ।’

अधिकारीले त्यही क्षेत्रबाट प्रतिनिधि सभा चुनाव जितेका थिए। चुनावी प्रचार सुरु नगर्दै नेता–कार्यकर्ता सम्पर्कमा आउन थालेपछि एमाले हौसिएको छ। यस्तोमा केन्द्रबाट खटिएका बास्कोटासहितका नेता दुई दिनदेखि चुनावलक्षित घरदैलो अभियान गरेर कार्यकर्ता फकाइरहेका छन्।