कसरा । विक्रमबाबा मेलामा हरेक दिनजसो भक्तजनको घुइँचो लागेको छ । भरतपुर महानगरपालिका–२३ को कार्यालय, निकुञ्ज प्रशासन, निकुञ्ज सुरक्षार्थ खटिएको नेपाली सेना र पूजा व्यवस्थापन समितिले विक्रमबाबाको मन्दिरमा चैत ७ गते मंगलबार पूजा गरेपछि मेला सुरू भएको हो । मेला चैत २३ गतेसम्म सञ्चालन हुनेछ ।

हरेक वर्ष चैते दसैँमा मनाइने मेलाका क्रममा राप्ती पुलबाट करिब दुई किलोमिटर निकुञ्जभित्र विक्रमबाबाको दर्शन तथा पूजापाठ गर्ने गरिन्छ । विक्रमबाबाको पूजा परापूर्वकालदेखि थारु जातिले गर्ने भए पनि पछिल्लो समय सबै समुदायले गर्न थालेको केरूङ्गा मध्यवर्ती उपभोक्ता समितिका अध्यक्ष अर्जुन भुजेल बताउँछन् ।

सन्तान प्राप्ति र सुखलगायत मनोकाङ्क्षा पूरा हुने विश्वासका साथ विक्रमबाबाको पूजा गर्ने प्रचलन छ । तर, विक्रमबाबाको पूजा गर्न आउनेहरुमा भने बर्सेनि आधुनिकता थपिँदै आएको उनी बताउँछन् । सुरूका दिनहरुमा जंगली हात्तीको त्रास देखिए पनि मेलामा उल्लेखनीय भक्तजनहरुको उपस्थिति रहेको उनले बताए । यसवर्ष अन्तसम्ममा चार लाख भक्तजनले मेला भर्ने अनुमान गरिएको उनले बताए ।

उनका अनुसार पहिले पहिले घरबाट पूरै सेता कपडा लगाउँदै खाली खुट्टा हिँडेर विक्रमबाबा आउँदै राप्ती नदीमा स्नान गरेर पूजापाठ गर्ने चलन थियो । तर, अहिले त्यस्तो छैन । भक्तजनहरु घरमै नुहाएर आफूअनुकूल कपडा लगाएर आउँदा झिलिमिली देखिन्छ विक्रमबाबा अहिले ।

पूजा गर्ने शैली र पूजा सामग्रीमा भने खासै परिवर्तन नभएको केरूङ्गा मध्यवर्ती उपभोक्ता समितिका अध्यक्ष अर्जुन भुजेलले बताए । ‘विक्रमबाबाको हिजो पनि रुखको फेदमै पूजा हुन्थ्यो र आज पनि त्यसरी नै भइरहेको छ’, उनी भन्छन्, ‘हिजो पनि बोका र परेवा नै बलि चढाइन्थ्यो, आज पनि त्यही चलन छ । यसमा खासै फरक छैन ।’

विक्रमबाबामा बलि चढाए पनि विक्रमबाबाआसपासमा भने खानपात, भोजभतेर त्यस्तो कुनै हुँदैन । खानपान, भोजभतेर जे गरे पनि घैलाघारीतर्फको खाली चौरमा ल्याएर गर्नुपर्ने चलन छ । निकुञ्ज क्षेत्र भएकोले जंगली जनावरको डर बढी नै हुने हुँदा राप्ती पारि ९जगतपुरतर्फको चौर०मा ल्याएरमात्रै खानपान गर्न मिल्ने चलन बसालेको भरतपुर महानगर वडा नं–२३ का वडाध्यक्ष दीपक दवाडी बताउँछन् ।

विक्रमबाबाको दर्शन गरे सन्तान नहुनेका लागि सन्तान प्राप्त हुने जनविश्वास छ । यहाँ सानो समीको बुटामुनि सामान्य थान छ । त्यसबाहेकका कुनै पनि संरचना छैन । जहाँ रुख छ त्यसैको फेदमा पातपतिङ्गर पन्छाएर पूजा गर्दै आएका छन्, भक्तजनहरु । विक्रमबाबा आइसकेपछि एकसाथ पूजा गर्न धेरै भीड हुने हुँदा थानको नजिकै आएर सबैले रुखको फेदमा पूजा गर्ने पुरानै चलन छ ।