शारदानगर । शारदानगरमा भैरहेको प्रथम बखान च्याम्पियन कपको दोस्रो दिनको खेलमा भरतपुर–१८ र १९ विजयी भएका छन् ।

भरतपुर महानगरपालिका–१९ मा रहेको प्रस्तावित बखान मिनी रङ्गशालामा भैरहेको पहिलो खेलमा युवा तथा खेलकुद विकास समिति भरतपुर–१९ ले युवा तथा खेलकुद विकास समिति भरतपुर–२४ लाई १–० ले हराएको छ । भरतपुर–१९ को जितमा विमल तामाङले खेलको २०औँ मिनेटमा निर्णायक गोल गरे । उनी प्लेयर अफ दी म्याचसमेत चुनिए ।

प्रतियोगिताअन्तर्गत दोस्रो खेलमा युवा तथा खेलकुद विकास समिति भरतपुर–१८ ले महिन्द्रा ट्रयाक्टर पटिहानी फुटबल क्लबलाई ३–१ गोलअन्तरले हराएको छ । भरतपुर–१८ का लागि १ एसिस्ट र दुई गोल गरेका जित मगर खेलको प्लेयर अफ दी म्याच चुनिए ।

भरतपुर–१९ वडा कार्यालय, युवा तथा खेलकुद विकास समिति भरतपुर–१९ र शारदानगर भूपू सैनिक कल्याणकारी संस्थाको आयोजनामा सुरू भएको प्रतियोगितामा जिल्लाभित्रकै कुल १२ वटा टिमले सहभागिता जनाएका छन् । प्रतियोगिताको विजेताले एक लाख ११ हजार १११ रूपैयाँसहित ट्रफी, मेडल र प्रमाणपत्र पाउनेछन् भने उपविजेताले ५५ हजार ५५५, मेडल र प्रमाणपत्र पाउनेछन् ।

हरेक खेलको उत्कृष्ट खेलाडीले एक हजार, त्यसैगरी प्रतियोगितामा सर्वोत्कृष्ट खेलाडी, डिफेन्डर, फरवार्ड, मिडफिल्डर, प्रशिक्षक र उदयीमान खेलाडी गरी जनही तीन हजारसहित प्रमाणपत्र प्राप्त गर्नेछन् । प्रतियोगिता चैत २० गतेसम्म सञ्चालन हुनेछ ।