खैरहनी । नसर्ने रोगको जोखिम हुन नदिन खैरहनी नगरपालिकाले बाआमा स्वास्थ्य कार्यक्रम सुरू गरेको छ ।

नगरपालिकाको वडा नम्बर–१, बहेराबाट यो कार्यक्रमको सुरूवात गरिएको हो । पछिल्लो समय सर्नेभन्दा नसर्ने रोगबाट मानिसहरु बिरामी हुने क्रम बढेको भन्दै यसको न्यूनीकरणका साथै वृद्धवृद्धाहरुको स्वास्थ्यलाई ख्याल गर्दै यो कार्यक्रम सुरू गरिएको स्वास्थ्य शाखा प्रमुख निर्मल घिमिरेले बताए । दीर्घरोगबाट बचाउँदै उनीहरुको दीर्घजीवनमा यो कार्यक्रमले मह¤वपूर्ण भूमिका खेल्ने उनको भनाइ छ ।

खैरहनी नगरपालिका प्रमुख शशिकुमार खनियाँले स्वास्थ्यकर्मीलाई स्वास्थ्य सामग्री हस्तान्तरण गर्दै यो कार्यक्रमको सुरूवात गरेका थिए । सो अवसरमा बोल्दै नगरप्रमुख खनियाँले नगरभित्र चिल्ला बाटो बने पनि त्यसमा हिँड्ने बुबाआमा स्वस्थ नरहे त्यो बाटोको अर्थ नहुने बताए । ‘भौतिक संरचना निर्माण, बाटोघाटो एउटा पाटो हो’, नगरप्रमुख खनियाँले भने, ‘त्यसमा हिँड्ने बुबाआमा स्वस्थ नरहँदा त्यस्ता बाटोको अर्थ छैन, त्यसैलाई बुझेर यो नयाँ अभियान सुरूवात गरेका हौँ ।’

नगरभित्रै कतिपय ठाउँमा सामान्य रोग लाग्दा पनि परीक्षण गर्न जाने अवस्था नरहेको उल्लेख गर्दै उनले यो कार्यक्रमलाई बाआमाहरुले अपनत्व ग्रहण गर्नुपर्नेमा जोड दिए । आगामी दिनमा ६८ वर्षभन्दामुनिका नगरवासीको स्वास्थ्य परीक्षण, प्रजनन स्वास्थ्य, पोषणलगायत कार्यक्रमलाई आवश्यकताअनुसार अघि बढाउने प्रमुख खनियाँले बताए ।

खैरहनी नगर उपप्रमुख कविता उप्रेतीले यो कार्यक्रमबाट लाभान्वित हुन बुबाआमाहरुलाई आग्रह गरिन् । साथै स्वास्थ्यकर्मीहरुले उनीहरुसँग सुमधुर सम्बन्ध बनाएर सेवाप्रवाह गर्नुपर्ने उनले बताइन् । खैरहनी–१ का वडाध्यक्ष नवराज भूषालले स्थानीय सरकार रहेको अनुभूति दिलाउन यो कार्यक्रम प्रभावकारी बनाउनुपर्ने बताए ।

यो कार्यक्रमअन्तर्गत ६८ वर्षभन्दामाथि उमेर समूहका सबैको घर–घरमा गएर सामान्य स्वास्थ्य परीक्षण, उच्च रक्तचाप, मधुमेहलगायतको परीक्षण गरिने नगरपालिकाका जनस्वास्थ्य निरीक्षक नवीन अधिकारीले जानकारी दिए । यो कार्यक्रममा सम्बन्धित वडामा रहेको स्वास्थ्यकेन्द्रका स्वास्थ्यकर्मी खटिनेछन् ।