भरतपुर । चितवनमा आगामी हप्ताबाट यातायात व्यवस्था सेवा कार्यालयले नयाँ कार्यालयबाट सेवा दिने तयारी गरेको छ । हाल यस कार्यालय भरतपुर एयरपोर्टअगाडि रहेको छ । अब भने जिल्ला समन्वय समितिअगाडि रहेको गेष्ट हाउस भवनबाट सेवा दिने तयारी कार्यालयको छ ।

चैतको १५ गतेअगावै सेवा सुरू गर्ने तयारी रहेको कार्यालय प्रमुख कालिप्रसाद भुजेलले बताए । लाइसेन्स ट्रायलका लागि अनलाइन आवेदन खोल्न यातायात व्यवस्था विभागमा अनुरोध भएको र अबको एक हप्तामा आवेदन खुलेर सेवा दिन थालिने उनले जानकारी दिए । ‘सेवा विस्तारका लागि नयाँ वर्ष पनि नकुर्ने कि भन्नेमा छौँ’, कार्यालय प्रमुख भुजेलले भने, ‘विभागले साथ दियो भने अर्को हप्ताबाट सेवा सुरू हुन्छ ।’

यो कार्यालयबाट सेवा सुरू भएसँगै यातायातसँग सम्बन्धित सबै काम भरतपुरबाटै हुने उनले बताए । त्यसका लागि भवन तयारी भएको र कर्मचारी पनि तयारी अवस्थामा रहेको उनले जनाए । ‘यातायात व्यवस्था विभागमा अनुरोध भई पठाएकोमा एक–दुई दिनमै फाइल सदर भई कामका लागि अनुमति आउने सूचना पाएको छु, त्यसैले अब काम ढिला हुन्न’, उनले भने ।

‘गेष्ट हाउस भवनमा सबै फाँट नपुगेपछि नयाँ संरचना पनि तयार पारेका छौँ, लिखित परीक्षा र बायोमेट्रिक कार्यालयमै हुन्छ, ट्रायलसम्बन्धी काममात्रै ट्रायल सेन्टरमा हुन्छ’, उनले भने । नयाँ लाइसेन्स र नवीकरण, ब्लुबुक दर्ता र नामसारी तथा नवीकरण, रूट परमिट, जाँचपासजस्ता मह¤वपूर्ण काम अब भरतपुरबाटै पाइने उनले बताए । एक हप्ता अनलाइन आवेदन लिएर अर्को हप्तामा ट्रायल दिने गरी काम गर्न लागिएको उनले बताए ।

यातायात व्यवस्था विभागका महानिर्देशक नारायणप्रसाद भट्टराईले यातायात प्रदेशअन्तर्गतको कार्यालय रहेकाले सबै अधिकार त्यहीँ रहेको बताए ।

लामो समयको विवादपछि चितवनमा ट्रायल सेन्टरको जिम्मा भने महालक्ष्मी मोटर ड्राइभिङले पाएको छ । ट्रायल सेन्टर भरतपुर बसपार्कबाट पूर्व–दक्षिणतर्फ १ किमीभित्र तीनतले चोकमा रहेको छ । गत वर्षबाट नै सेवा दिने तयारी रहे पनि ट्रायल सेन्टर सञ्चालनको विषयमा भएको विवाद नटुङ्गिँदा समय धकेलिएको थियो ।

अब भने कुनै समस्या नभई सञ्चालनमा आउने कार्यालय प्रमुख भुजेलले बताए । ट्रायल सेन्टरमा ५ सय जनाको कोटा निर्धारण गरेर काम थालिने उनले बताए ।