चितवन, चैत ८–

पाँच वर्षपछि हुने स्थानीय तहको निर्वाचनका लागि इन्जिनियर प्रविन काफ्लेले तयारी थालेका छन् । गएको बैशाखमा भएको स्थानीय तहको निर्वाचनमा उनी भरतपुर महानगरपालिकाको मेयरमा उम्मेदवार बनेका थिए । विवेकशिल साझा पार्टीबाट उम्मेदवारी दिएका उनले २९८ मत मात्रै प्राएका थिए ।

२०८४ सालमा हुने निर्वाचनमा पनि भरतपुर महानगरको मेयरको लागि उमेदवारी दिने उनले बताएका छन् । चैत १ गतेदेखि सुरु गरेको भरतपुर यात्रालाई त्यसको तयारीका रुपमा पनि बुझ्न सकिने उनी बताउँछन् ।

उनले बैशाख १० गते हुन लागेको उपनिर्वाचन अगाडि नै भरतपुर महानगरलाई सुझाव पत्र पनि पेश गर्दै छन् । त्यसका लागि उनी भरतपुरका २९ वटै वडामा पुगेर जनतासँग भेटेर उनीहरुका सुझाव तथा गुनासो संकलन गर्दै छन् ।

चैत १ गतेदेखि ‘भरतपुर यात्रा’मा निस्किएका काफ्ले सातौँ दिनसम्म २० भन्दा बढी वडामा पुगिसकेको बताउँछन् । यात्राका क्रममा उनलाई जनताले नारायणी लिफ्ट र खगेरी सिंचाईका नहर पुरिँदा कृषकलाई सिंचाईमा समस्या भएको, किसानले आफ्नो उत्पादनको उचित मूल्य नपाएको, बेरोजगारी बढेको लगायतका गुनासो गरेका छन् ।

त्यस्तै, किसानले मल नपाएको, नहर पुरेर प्लटिङ बनाएको, भरतपुर–२९ को चौकीडाँडामा खानेपानीको समस्यालगायतका विषयमा महानगरलाई सुझाव पत्र पेश गर्न लागिएको उनले बताए । ‘जनताका यस्ता समस्या छन् । समाधानका लागि यसरी अघि बढ्दा राम्रो हुन्छ भनेर सुझाव दिने एउटा प्रयास गरेको हो’, उनी भन्छन्, ‘चुनावको तयारी पनि हो । राजनीतिज्ञ हुनको लागि नागरिक तहसम्म पुग्नुपर्छ भन्ने सन्देश दिन पनि यो गरेको हो ।’

ग्रामिण भेगका सामुदायिक विद्यालयको अवस्था कमजोर रहेको र विजुली सहज नभएको उनले बताए । मंगलबार भरतपुर अस्पताल पुगेका उनले बर्खामा अस्तपाल नै डुबानमा पर्ने जोखिम रहेकोले यसतर्फ सरोकारवालाहरु सचेत हुनुपर्ने बताए ।