रत्ननगर । रत्ननगर वडा नं ६ सौराहामा रहेको नेपाल र्सिजनशिल बाल संरक्षण केन्द्रको शनिवार १३औं बार्षिक साधारण सभा तथा सामाजिक परीक्षण गरिएको छ ।

वडा नं ६ की वडा सदस्य केशरीमाया सुनार प्रमुख अतिथि रहेको सो कार्यक्रममा सचिव गीता तिवारीले बार्षिक प्रतिवेदन र शोभा पाठकले आर्थिक प्रतिवेदन प्रस्तुत गरेका थिए । उक्त दुईवटा प्रतिवेदन साधारण सभाको बन्दसत्रमा सर्बसम्मत पारित भएको छ । साधारण सभासंगै केन्द्रको आर्थिक बर्ष २०७८र७९ को सामाजिक परीक्षण समेत गरिएको छ ।

संस्थाका सल्लाहाकार तथा सामाजिक अगुवा उदयचन्द्र अर्यालले सामाजिक परीक्षण अन्तर्गत संस्थाको उद्देश्य र प्रगति विवरण प्रस्तुत गरेका थिए । सो अबसरमा अर्यालले अभिभावकको संरक्षण नपाएका वालवालिकालाई आवासीय सुविधा सहित शिक्षा प्रदान गरेको भन्दै केन्द्रको प्रशंसा समेत गरेका थिए ।

संस्थाकी अध्यक्ष शुशीला भट्टराईले सामाजिक सेवा कार्यको लागि आर्थिक अबस्था कमजोर भएका र अभिभावक गुमाएका बालवालिकाहरुलाई शिक्षा प्रदान गरिरहेको बताइन् । वडा सदस्य सुनारले अभिभावकको संरक्षण नपाएका वालबालिकाहरुलाई शिक्षा दिएर केन्द्रले मानब सेवाको उत्कृष्ट नमुना पेश गरेको बताइन् । सो केन्द्रमा पाँच जना चेपाङ सहित ११ जना वालवालिका आश्रित छन् ।

२०६५ सालमा स्थापना भएको सो संस्थाले अहिले सम्म १५ जना बालबालिकालाई परिवारमा पुनर्मिलन समेत गराएको छ । साधारण सभामा नेपाल बाल कल्याणगृहकी अध्यक्ष गोमा विक, अनाथ बालवालिका तथा बालगृहकी अध्यक्ष राममाया लामा,वर्ड एजुकेशन सोसाइटीका अध्यक्ष टीका गिरी लगायतले मन्तव्य राखेका थिए ।