भरतपुर । विश्व उपभोक्ता अधिकार दिवसको अवसरमा भरतपुर महानगरपालिकाको मुख्य बजार क्षेत्रमा अनुगमन गरिएको छ । उपभोक्ता अधिकार संरक्षण मञ्च चितवनको समन्वयमा खाद्य प्रविधि तथा गुण नियन्त्रण डिभिजन कार्यालय र घरेलु तथा साना उद्योग कार्यालयका प्रतिनिधि सम्मिलित टोलीले अनुगमन गरेको हो ।

चैत १ गते परेको दिवसको अवसरमा तीन दिनसम्म बजार अनुगमन गरिएको थियो । तीन दिनमा २७ वटा पसलमा अनुगमन गरिएको उपभोक्ता अधिकार संरक्षण मञ्च चितवनका अध्यक्ष शैलेन्द्र श्रेष्ठले बताए । अनुगमन टोलीले भरतपुर बसपार्क र पोखरा बसपार्कका होटल, किराना, मोबाइल र कपडा पसलमा अनुगमन गरेको उनले बताए ।

‘अत्यावश्यक वस्तु पानीमा पनि अत्यधिक मूल्य लिएको भन्ने गुनासो आएकाले बोतलमा पाइने पानीमा हामीले प्राथमिकता दियौँ । बोतलमै २० रूपैयाँ मूल्य तोकिए पनि बजारमा ३० रूपैयाँसम्म लिने गरिएको रहेछ’, उनी भन्छन्, ‘अनुगमनका क्रममा १५ वटा पसलले बढी मूल्य लिएको पायौँ ।’ मोबाइल र कपडाजन्य वस्तुमा उपभोक्ताले देख्न सक्ने गरी मूल्य उल्लेख गर्नुपर्ने भन्दै उनले व्यवसायीले यसलाई गम्भीरतापूर्वक लिनुपर्ने बताए । मूल्य उल्लेख भएपछि उपभोक्ताहरु ठगिनबाट बच्न सक्ने उनी बताउँछन् ।

खाद्य प्रविधि तथा गुण नियन्त्रणका प्रमुख घननाथ अधिकारीले यात्रुको बढी चहलपहल हुने ठाउँका पसलमा खानेकुराहरु खुल्लारुपमा राखेको पाइएकाले खानेकुराहरु छोपेर राख्न र रङको प्रयोगमा ध्यान दिन आग्रह गरिएको बताए । ‘साना व्यवसायीलाई पहिलोपटकका लागि सुधारको मौका दिने गरेका छौँ । बारम्बार कमजोरी भयो भने हामीले कानुनअनुसार कारबाही गर्छौं’, उनले भने ।