भरतपुर । इच्छाकामना गाउँपालिकामा कुखुरा ओसारपसारका सवारीसाधनमाथि गैरकानुनीरुपमा कर असुली भएको आरोप लगाइएको छ । चितवन नवलपुर दाना वितरक संघ नारायणगढले इच्छाकामना र भरतपुरको सीमा क्षेत्रमा गैरकानुनीरुपमा कर असुली भएको आरोप लगाएको हो । संघले कुखुरा र चल्ला बोकेका गाडीहरु रोकेर गैरकानुनीरुपमा कर असुली भएको भन्दै सोमबार जिल्ला प्रशासन कार्यालय भरतपुरमा ज्ञापन पत्र नै बुझायो ।

संघका अध्यक्ष तेजनारायण पाण्डेले अवैधरुपमा कर असुलीको धन्दा तत्काल रोक्नलाई माग गर्दै जिल्ला प्रशासन कार्यालयमा ज्ञापन पत्र बुझाइएको बताए । उनीसहितको संघको एक टोलीले प्रमुख जिल्ला अधिकारी सुरेन्द्र पौडेललाई ज्ञापन पत्र बुझाएको थियो ।

ज्ञापन पत्र बुझाउँदै संघका अध्यक्ष पाण्डेले भने, ‘भरतपुर महानगरपालिका र इच्छाकामना गाउँपालिकाको सिमानामा कुखुरा र चल्ला बोकेका गाडीहरुलाई रोकेर मनलाग्दी तरिकाले करको नाममा रकम असुली भइरहेको छ, अवैधरुपमा भएको कर असुली तत्काल रोक्न हामी माग गर्दछौँ ।’ उनले कुखुरा ओसारपसारका गाडीहरुबाट ५ सयदेखि ९ सय रूपैयाँसम्म कर असुली भएको बताए । उनले इच्छाकामना गाउँपालिकाबाट यस्तो हर्कत भएको आरोप लगाए ।

ज्ञापन पत्र बुझेपछि प्रमुख जिल्ला अधिकारी सुरेन्द्र पौडेलले अवैधरुपमा कर असुली गर्न नमिल्ने बताए । उनले भने, ‘कहाँ, कसरी कर असुली भइरहेको रहेछ अध्ययन गरी अवैधरुपमा भएको पाइए तत्काल नियन्त्रण गरिनेछ ।’

इच्छाकामना गाउँपालिकाले इच्छाकामनाबाट चौपाया, तरकारी ओसारपसार गर्दा सरसफाइका लागि न्यूनतम कर लिने गरिएको जनाएको छ । गाउँपालिकाले कुखुरा तथा चल्ला ओसारपसारमा ठेकेदार पक्षले कर लिन नमिल्ने जनाएको छ ।

गाउँपालिकाका प्रमुख दानबहादुर गुरूङले ठेकेदार पक्षसँग कुखुराको गाडी ओसारपसारमा कर लिने कुनै सर्त नरहेको बताए । उनले भने, ‘इच्छाकामना गाउँपालिकाबाट चौपायाहरु ९बाख्रालगायत०, तरकारीहरु अन्यत्र लैजाँदा दुई सयदेखि ३०० रूपैयाँ कर उठाउन ठेकेदार पक्षसँग सम्झौता भएको हो, कुखुराको गाडीसँग कर असुली गर्नेमा कुनै सम्झौता भएको छैन ।’ उनले ठेकेदार पक्षले सर्तबेगर कर असुली गरेको पाइएको खण्डमा सम्झौता नै रद्द गर्न सकिने बताए । अध्यक्ष गुरूङले अवैध कर असुली भएको गुनासो इच्छाकामना गाउँपालिकामा हालसम्म नपरेको जानकारी दिए ।