रत्ननगर । चितवनको पर्यटकीय नगरी सौराहामा रहेको बाघमारा मध्यवर्ती सामुदायिक वनले सोमबार बालीनालीको क्षतिपूर्ति स्वरुप राहत वितरण गरेको छ ।

वन्यजन्तु मानब बस्तीमा प्रवेश गरेर अन्नबालीमा गरेको क्षतिको सामुदायिक वनले क्षतिपूर्ति स्वरुप राहत वितरण गरेको हो । सामुदायिक वनको कार्यालयमा आयोजित कार्यक्रममा वनका अध्यक्ष जीतु तामाङले किसानहरुलाई राहत रकम हस्तान्तरण गरेका थिए । वन्यजन्तुले तोरी,मसुरो र धानको बीउमा परेको क्षतिको राहत प्रदान गरिएको अध्यक्ष तामाङले बताए ।

७५ घरधुरीलाई १ लाख ६० हजार ५०० रुपैया राहत स्वरुप वितरण गरिएको छ । किसानहरुले न्यूनतम एक हजार देखि अधिकतम ५ हजार रुपैया सम्म राहत रकम पाएका छन् । सो सामुदायिक वनले सुत्केरीलाई पोषण भत्ता समेत वितरण गरेको छ । ८२ जनालाई जनही २ हजारका दरले १ लाख ६४ हजार रुपैया वितरण गरिएको अध्यक्ष तामाङले बताए ।

सौराहाको पर्यटनलाई मुख्य आम्दानीको स्रोत बनाएको सो सामुदायिक वनले संरक्षण र जीविकोपार्जनलाई महत्व दिएर काम गर्दैै आएको छ । केही बर्ष अघि सम्म सामुदायिक विकासलाई जोड दिएको सो वनले पछिल्लो समय सीप विकास मार्फत गरिबी निवारणको कामलाई जोड दिइएको वनका अध्यक्ष तामाङले बताए ।

वन्यजन्तुलाई बस्तीमा छिर्न नदिन वन र बस्तीको सिमानामा पर्खाल लगाउने कामलाई समेत तीब्र पारिएको छ । बोद्रहनी क्षेत्रमा अहिले सम्म करिक २ किलोमिटर कंक्रिट पर्खाल लगाउने काम सकिएको र बाँकी ठाउँहरुमा पर्खाल निर्माण गर्ने योजना रहेको बताए ।

सामुदायिक वनमा क्यानोपीवाक निर्माणको काम चालु आर्थिक बर्षबाटै सुरु हुने भन्दै अध्यक्ष तामाङले चितवनमा नौलो पर्यटनकोे अभ्यासका लागि क्यानोपीवाक निर्माण गर्न लागिएको बताए ।