रत्ननगर । रत्ननगर नगरपालिका वडा नं ६ मा रहेको मृगकुञ्ज मध्यवर्ती बचत तथा ऋण सहकारी संस्थाको कार्यालयमा लगाएको ताला आइतबार खुलेको छ ।

शनिबार साझ बसेको सर्बदलीय बैठकले सहमतीका आधारमा सो संस्थाको नयाँ नेतृत्व सहित कार्यसमिति चयन गर्ने सहमति भएपछि फागुन १७ गते गरिएको तालाबन्दी आइताबार खुलेको हो । सर्वदलीय बैठकले सो सहकारीमा पदको भागबण्डा गर्ने जिम्मेवारी रत्ननगरका मेयर प्रल्हाद सापकोटा र उपमेयर यादब प्रसाद पाठकलाई दिएको बुझिएको छ ।

निर्वाचन समितिले विभिन्न पदमा उम्मेदवारी दिएका ४० जनाको उम्मेदवारी खारेज परेपछि सो सहकारीको नयाँ नेतृत्व चयनमा विवाद देखिएको थियो । निर्वाचन समितिले क्षेत्राधिकार भन्दा बाहिर गएर उम्मेदवारी बदर गरेको भन्दै उम्मेदवारी दिएका मध्येहरुबाट केहीले सो सहकारीको कार्यालयमा तालाबन्दी गरेका थिए ।

उता निर्वाचन समितिले भने सहकारीले बनाएको निर्वाचन नीति अनुसार छानविन गर्दा सबै उम्मेदवारहरुले दिएको उम्मेदवारी कायम गर्न नमिल्ने भएकाले सोही अनुसार उम्मेदवारी बदर गरेको जनाएको थियो ।