रत्ननगर । रत्ननगर नगरपालिका वडा नं १५ मा प्रथम वडा स्तरीय नकआउट फुटवल प्रतियोगिता शनिबार देखि सुरु भएको छ ।

माधवपुर खेलकुद विकास समितिले आयोजना गरेको सो प्रतियोगिताको मेयर प्रल्हाद सापकोटाले एक औपचारिक समारोहका बीच उद्घाटन गरेका छन् । सो अबसरमा उनले स्थानीय सरकारको रुपमा रहेको रत्ननगर नगरपालिकाले खेलकुदलाई विशेष प्राथमिकतामा राखेर बजेट विनियोजन गरेको बताए ।

वडा स्तरमा हुने विभिन्न खेलका प्रतियोगिताहरुले राष्ट्रिय तथा अन्तराष्ट्रिय स्तरमा प्रतिस्पर्धा गर्न सक्ने खेलाडी जन्माउने उनको भनाई छ । खेलकुदले मान्छेलाई अनुसासित बनाउने भन्दै उनले युवाहरुलाई कुलतमा फस्नबाट खेलकुदले जोगाउने मेयर सापकोटाले बताए । उद्घाटन कार्यक्रममा वडा नं १५ का वडाध्यक्ष आशिक तामाङले समग्र नगरको खेलकुदको विकासको लागि माधवपुरमा वडा स्तरीय खेलकुद प्रतियोगिता सुरु भएको भन्दै यसले खास अर्थ राख्ने बताए ।

गाउँको बीचमा रहेको जग्गा भाडामा लिएर खैलमैदान निर्माण गरी प्रतियोगिता सुरु गर्नु चानचुने विषय नभएको उनको भनाई छ । सो प्रतियोगिता सञ्चालनको लागि वडा कार्यालयको विशेष सहयोग रहेको छ । प्रतियोगिता अन्तर्गत शनिवार वडा नं १४ र वडा नं १५ बीच प्रतिस्पर्धा भएको छ ।

१६ वटा टिमको सहभागिता रहेको सो प्रतियोगितामा प्रथम हुने टिमले ५१ हजार र दोस्रो हुने टिमले ३० हजार ५०० नगद पुरस्कार सहित शिल्ड,मेडल र प्रमाणपत्र प्राप्त गर्नेछन् । माधवपुर खेलकुद विकास समितिका अध्यक्ष गणेश लामाको अध्यक्षतामा भएको कार्यक्रममा वडाध्यक्षहरु वालकृष्ण चापागाईँ, कुलप्रसाद सापकोटा, होमनाथ रानाभाट, हेमराज थापा लगायतको सहभागिता रहेको थियो ।