खैरहनी । चैते धान रोपाइँको सिजन सुरू भए पनि रासायनिक मल प्राप्त गर्न नसेको भन्दै चितवनका किसानले आन्दोलन सुरू गरेका छन् । चितवन खैरहनीका किसानले पर्याप्त मल पाउनुपर्ने माग गर्दै सडक जाम गरेर प्रदर्शनमा उत्रिएका हुन् । यस क्षेत्रको कतिपय ठाउँमा अहिले रोपाइँ भइसकेको छ ।

खैरहनीको कठार, कुमरोजलगायतमा रोपाइँ सुरू भएको छ । तर रोपाइँका लागि आवश्यक पर्ने रासायनिक मल सहज उपलव्ध हुन नसकेको भन्दै खैरहनी ९ र १० का किसानहरु आन्दोलित बनेका हुन् । उनीहरुले पूर्व–पश्चिम राजमार्गअन्तर्गत सिमलटाँडी चोकमा सवारी आवागमन अवरूद्ध गरेर करिब एक घन्टा प्रदर्शन गरेका थिए । उनीहरुले प्रतिकट्ठा २५० ग्राम मल पनि पाउन नसकेको बताएका छन् ।

खैरहनी–९ मा टोल विकास संस्थाहरुले सहजीकरणका लागि भूमिका खोजेर लगत संकलनको काम गरेको आरोप लागेको छ । पिपरा टोल विकास संस्थाका अध्यक्ष दुर्गा खरेलले वडा र नगरले आफूहरुलाई निर्देशन नदिएको स्पष्ट पार्दै सहजकर्ताका लागि भूमिका निर्वाह गर्न खोजेको बताए ।

खरेलका अनुसार आफ्नो वडामा चैते धान लगाउने क्षेत्रफल करिब ५० बिघा १५ कठ्ठा रहेको जानकारी दिए । एक कट्ठा खेती गर्ने देखि २–३ बिघा खेती गर्ने किसानलाई समान मल वितरण गर्न सुरू गरिएको थियो । एकै घरका सदस्यहरुले तीन÷चार ठाउँबाट मल लिएको गुनासो आएपछि समानुपातिक वितरण गर्न खोजिएको खरेलले बताए ।

किसानहरुले भने आवश्यक मल पाउन नसकेको भन्दै आन्दोलनमा उत्रनु परेको बताएका छन् । उनीहरुले राजमार्ग अवरूद्ध गर्दै एक पाउ मल चाहिँदैन, गोजीमा मल लगिँदैन, जनप्रतिनिधि मल सहज गर, किसानको माग पूरा गरलगायतका नारा लगाएका थिए ।

खैरहनी–९ पिपराकी किसान कविता पाठकले मल पाउन नसकेका किसानहरुको आक्रोशलाई गम्भीररुपमा लिनुपर्ने बताइन् । प्रतिकट्ठा कम्तीमा साँढे दुई किलो मल प्रयोग गर्नुपर्नेमा २५० ग्राममात्र उपलव्ध गराइएको भन्दै आक्रोशित किसानहरुले सडक अवरूद्ध गरेको उनले बताइन् । उनले ३५ कट्ठामा चैते धान लगाउने तयारी गरेकी छिन् ।

‘टोल विकास संस्थाले लगत संकलन गर्दा साँढे दुई किलो प्रतिकट्ठा माग ग¥यौँ, किसान पाठकले प्रश्न गर्दै भनिन्– ‘मल लिन जाँदा प्रतिकट्ठा २५० ग्राम दिइयो, यति मलले के गर्ने रु’ नगरपालिकालाई प्राप्त हुने मल नगरले वडाका सहकारी तथा एग्रोभेटहरुलाई मल पठाउने र वडाको समन्वयमा ती संस्थाहरुले किसानहरुलाई मल वितरण गर्दै आएका छन् ।

रासायनिक मल सहज उपलव्ध गराउनुपर्ने माग गर्दै खैरहनी–५ का किसानहरुले पनि केही दिनअघि नगरपालिका कार्यालयमा प्रदर्शन गरेका थिए ।