चितवन । माडी नगरपालिकामा सूर्यमुखी फूलको व्यवसायिक खेती बढ्दै गएको छ ।

माडी(१ का पूर्ववडाध्यक्ष कृष्ण पौडेलसहितको समूहले गत वर्षदेखि माडी(१, लक्ष्मुनियामा सामूहिक रुपमा व्यवसायिक रुपमा सूर्यमुखी फूलखेती थालेको हो । सो खेतीमा सूर्यमुखी महिला किसान समूह र काठमाडौँको हिमालय अर्गानिक गार्डेनको समेत सहभागिता रहेको छ ।

त्यसबाहेक पौडेलले माडी(२, पर्साफाँटमा आफ्नै साढे दुई बिघा जग्गामा पनि सूर्यमुखी खेती गर्नुभएको छ । उत्पादन, प्रशोधन र बजारीकरणमा बिचौलियालाई प्रवेश गर्न नदिने गरी सूर्यमुखीको खेती गरिएको पौडेल बताउनुहुन्छ । प्राङ्गारिक मलको प्रयोग गरी गरिएको खेती राम्रोसँग सप्रिएको पनि छ ।

अब माडीमै सूर्यमुखीको तेल ब्रान्डिङसहित प्रशोधन गर्ने पौडेलको भनाई छ । तेल प्रशोधनका लागि बागमती प्रदेश सरकारले माडी नगरपालिका मार्फत २० लाख रूपैयाँ अनुदान समेत दिएको छ । सूर्यमुखी खेती भएको स्थान सामाजिक सञ्जालमा भाइरल समेत भएको छ, जसलाई हेर्ने, फोटो खिच्ने र टिकटक बनाउनेको संख्या बढिरहेको छ ।