भरतपुर । भरतपुर महानगरपालिका राजस्व संकलनमा लक्ष्यनजिक पनि पुग्न सकेको छैन । कोरोनाको कहर, आर्थिक मन्दीलगायतका प्रमुख कारणले राजस्व संकलनको लक्ष्यमा पुग्न नसकिएको भरतपुर महानगरले जनाएको छ ।

कोरोना कहर सुरू भएयता भरतपुर महानगर राजस्व संकलनमा लक्ष्यनजिक पनि पुग्न सकेको छैन । बर्सेनि भरतपुर महानगरको राजस्व संकलनमा कमी आइरहेको छ । आर्थिक वर्ष २०७९÷८० को पछिल्लो ६ महिना ९साउनदेखि पुससम्म०मा भरतपुर महानगरको राजस्व संकलनमा निकै कमी आएको छ । यही आधारले राजस्व संकलन हुने हो भने आन्तरिक खर्च धान्न पनि भरतपुर महानगरलाई हम्मे पर्ने देखिन्छ ।

भरतपुर महानगरले चालू आर्थिक वर्षका लागि १ अर्ब ५० करोड राजस्व संकलन गर्ने लक्ष्य लिएको छ । पछिल्लो ६ महिनाको राजस्व संकलनलाई हेर्ने हो भने महानगरले राजस्व संकलनमा लक्ष्यनजिक पनि पुग्ने देखिँदैन । भरतपुर महानगरले चालू आर्थिक वर्षको पहिलो ६ महिनाको अवधिमा लक्ष्यको २७ प्रतिशतमात्रै राजस्व संकलन भएको जनाएको छ ।

भरतपुर महानगर प्रमुख रेनु दाहालले भरतपुर महानगरको राजस्व संकलनमा कमी आएको बताइन् । उनले लक्ष्य भेट्टाउने गरी कामलाई अघि बढाइने बताइन् । प्रमुख दाहालले भनिन्, ‘आर्थिक क्षेत्र फस्टाउन नसक्दा, कोभिडको कहरले व्यवसायलाई गाल्दा र पछिल्लो समय बैंकले ऋण प्रवाह नगर्दा राजस्व संकलनमा कमी आएको छ, यसलाई सुधार गरेर लैजान जरूरी छ ।’

भरतपुर महानगरपालिकामा बिहीबार भएको आर्थिक वर्ष ०७९र०८० सालको कर अभियानको उद्घाटन कार्यक्रममा मेयर दाहालले राजस्व संकलनमा कमी आउन नदिने बताइन् ।

महानगरपालिका हुनलाई न्यूनतम १ अर्ब आन्तरिक आम्दानी हुनुपर्ने कानुनी प्रावधान छ, तर महानगरको आन्तरिक आम्दानी यस आर्थिक वर्षमा त्यति नहुने देखिएको छ । महानगरपालिका प्रमुख दाहालले अहिलेको राजस्व संकलनको अवस्था हेर्दा चालू आर्थिक वर्षमा १ अर्ब संकलन हुन नसक्ने सङ्केत देखिएको बताइन् ।

‘भरतपुरको राजस्व संकलनको अवस्था निकै टीठलाग्दो देखिएको छ’, प्रमुख दाहालले भनिन्, ‘करको दायरालाई फराकिलो पार्दै संकलनमा महानगरको लक्ष्य पूरा गर्नुपर्ने आवश्यकता छ ।’ कर अभियानलाई प्रभावकारी बनाउन आफ्नो तर्फबाट आवश्यक सहजीकरण गर्न तयार रहेको प्रमुख दाहालले बताइन् । भरतपुरको सबैभन्दा बढी कर उठ्ने घर बहाल करलाई थप प्रभावकारी बनाउनुपर्ने उनको भनाइ थियो ।

यसैबीच, बिहीबार कर अभियान कार्यक्रममा राजस्व महाशाखा प्रमुख विसुराम कुँवरले आफ्नो घरको घर बहाल कर तिरेर अभियानको उद्घाटन गरेका छन् । घर बहाल करको रसिद महानगर प्रमुख दाहालले महाशाखा प्रमुख कुँवरलाई हस्तान्तरण गरेकी थिइन् ।

महानगरपालिकाको आन्तरिक आम्दानीले विकासमा धेरै बजेट लगाउन नमिल्ने देखिएको छ । अब भरतपुरको विकास निर्माणमा केन्द्र र प्रदेश सरकारको बजेट पर्नुपर्ने देखिएको छ । महानगरपालिकाले आफ्नो आन्तरिक आम्दानी कम भए पनि केन्द्र र प्रदेश सरकारको बजेटबाट ठूला गौरवका आयोजनाहरुका काम गरिरहेको छ ।

यस्तै, भरतपुर महानगरपालिकाको आर्थिक वर्ष २०७७र०७८ मा पनि राजस्व संंकलनमा कमी आएको थियो । आर्थिक वर्ष २०७६र०७७ को तुलनामा २०७७र०७८ मा ४ दशमलब ४१ प्रतिशतले राजस्व संकलनमा कमी आएको थियो । विश्वभर महामारीको रुपमा फैलिएको कोभिड–१९ का कारण आन्तरिक आयमा कमी आएको हो ।

२०७८र०७९ मा भरतपुर महानगरले आन्तरिक आयबाट एक अर्ब २० करोड राजस्व संकलन गर्ने जनाए पनि लक्ष्य प्राप्त हुन सकेन ।