चितवन, माघ १३–

भरतपुर महानगरपालिकामा फोहोर व्यवस्थापनको विषयलाई लिएर ‘सेभ नारायणी’का अभियान्ताले शहरी विकास मन्त्री विक्रम पाण्डेको ध्यानाकर्षण गराएका छन् । मन्त्री पाण्डे चितवन आएको मौका पारि उनकै निवासमा पुगेर अभियान्ताले ध्यानाकर्षणसहितको पत्र दिएका हुन् ।

सर्वोच्च अदालतको आदेशपछि पनि नारायणी नदी किनारमा गाडिएको फोहोर ननिकालिएको पत्रमा उल्लेख गरिएको छ । साथै भरतपुरमा सुरक्षित र आधुनिक ल्यान्डफिल साइट निर्माणको लागि आवश्यक पहल गरिदिन उनीहरुले मन्त्री पाण्डेलाई आग्रह गरेका छन् । आफ्नो मागबारे मन्त्री सकरात्मक देखिएको सेभ नारायणीका अभियान्ता सचिन चापागाईले बताए ।

‘उहाँले यस अभियानलाई निरन्तरता दिन र महानगरपालिकालाई दीर्घकालीन फोहोर व्यवस्थापनको लागि ल्यान्डफिल साइट निर्माण गर्न जिम्मेवार नागरिक र जागरुक युवाहरुले आवश्यक दबाब दिइरहन सुझाव दिनु भएको छ’, उनले भने । फोहोर व्यवस्थापनको लागि मन्त्रालयको तर्फबाट महानगरपालिकासंग आवश्यक सहयोग र सहकार्य गर्ने मन्त्री पाण्डेले प्रतिबद्धता व्यक्त गरेको उनले बताए ।