माडी । माडी नपा–९, प्याउली गाउँमा जंगली हात्तीले बुधबार बेलुका करिब ९ बजेको समयमा पाँचवटा घर भत्काएको छ । माडीकै कुसुमखोला हुँदै प्याउली गाउँमा छिरेको जंगली हात्तीले स्थानीय बासिन्दाहरु श्यामबहादुर तामाङ, दिलबहादुर थिङ, जगत प्रजा, सोम भुजेल र धनप्रसाद तामाङको घर भत्काएको हो ।

मानवीय क्षति नभए पनि हात्तीले घरभित्रको अन्नपात, लत्ताकपडा नोक्सान पारिदिएको वडा अध्यक्ष घनश्याम दवाडीले जानकारी दिए । पछिल्लो समय जंगली हात्तीको आतङ्कबाट स्थानीयवासीहरुले सन्त्रास भोग्दै आएको उनले बताए ।

यही पुस गते हात्तीले प्याउलीमा तीन घर भत्काउनुका साथै घरमा भएको अन्न नष्ट गरेको थियो । प्याउलीका सावित्री सापकोटा, किरण सापकोटा र कुमार तामाङको घर राति २ बजेको समयमा भत्काएको वडा अध्यक्ष दवाडीले बताए ।

करिब दुई वर्षअघि पनि हात्तीले आक्रमण गर्दा माडीको सोही गाउँमा एक जनाको ज्यान गएको थियो भने तीन जना घाइते भएका थिए । उनीहरुमध्ये एक जना घाइते अझै उपचाररत नै छन् ।

अहिले सो क्षेत्रमा जनपद र सशस्त्र प्रहरी परिचालन गरिएको प्रहरीले जनाएको छ । बिहानको समयमा भने हात्ती जंगल पसेको र कुनै पनि बेला हात्ती आउन सक्ने भन्दै स्थानीय त्रसित भएका छन् ।

दैनिकजसो हात्ती आतङ्क फैलिरहेको भन्दै स्थानीयवासीले हात्ती नियन्त्रण गर्न चितवन निकुञ्जसँग माग गर्दै आएका छन् । निकुञ्जमा रहेको ध्रुवे नामको हात्तीले आतङ्क मच्चाइरहेका बेला अन्य हात्तीले पनि पटकपटक बस्तीमा पसेर घर भत्काउँदै आएका छन् ।

माडी नपा–९ मा बाँदरझुला, कुसुमखोला र प्याउली पर्छन् । जहाँ मकवानपुर, तनहुँ, पर्सा, लमजुङ, चितवनबाट आएर बसोवास गर्ने सुकुमबासीहरु छन् । यहाँ कात्तिक ०४७ बाट सुकुमबासी आउने क्रम बढेको हो । यहाँ ७६० घरधुरी छन् र छ हजार ५०० जनसंख्या छ । जंगलको बीचमा रहेको यो बस्तीको भारतसँग सीमा जोडिएको छ ।