हाम्रो घाँटीमा रहेको करीब २ ईन्च लामो र सानो आकारको, पुतली जस्तो बनावट भएको, स्वरयन्त्रको मुनि र घाँटीको अगाडि रहेको शरीरको महत्वपूर्ण ग्रन्थीलाई थाइराइड ग्रन्थी भनिन्छ । यसले मुख्यतः टाउकोमा रहेको प्रमुख ग्रन्थी (पिटिट्युरी ग्लान्ड) ले निकाल्ने एक प्रकारको रसको संकेत प्राप्त गरी दुई किसिमको रस वा हर्मोन उत्पादन गर्दछ, जुन हर्मोनको काम शरीरलाई सन्तुलन र स्वस्थ राख्नु हो । साथै, यी हर्मोनका काम शरीरका मुख्य कार्यहरु सम्पादन गर्नु, मस्तिष्क र स्नायु प्रणालीको विकास गर्नु, श्वास प्रश्वास नियमित राख्नु, मांसपेशी बलियो बनाउनु, छाला चिल्लो बनाउनु हो । साथै, यसको काम महिनावारी नियमित बनाउनु, कोलेस्टेरोल सन्तुलित राख्नु, मेटाबोलिज्म् व्यवस्थित पार्नु र शरीरको तापक्रम तथा मुटुको चाल समेत सामान्य राख्नु हो ।
यदि थाइराइड ग्रन्थीको निष्क्रियता भएमा जतिसुकै संकेत मष्तिस्कको उक्त पिटिट्युरी ग्रन्थीले दिएता पनि थाइराइड ग्रन्थीले आफ्नो कार्य राम्रोसँग गर्न नसकेको अवस्थामा हर्मोनको उत्पादन कम भई शरीरमा देखा पर्ने विभिन्न असरयुक्त अवस्था नै बोलीचालीको भाषामा थाइराइड हो । यसलाई चिकित्सिकीय भाषामा हाइपोथाइराइडिज्म् भनिन्छ । शरीरमा थाइराइड हर्मोनले कोषभित्र हुने महत्वपूर्ण पाचन (मेटाबोलिज्म) प्रक्रियालाई छिटो बनाउने कुराको नियन्त्रण गर्दछ । कोषभित्र जति बढी छिटो र राम्रो पाचन भयो, त्यति नै क्यालोरीको जलन भई शक्ति उत्पादन हुन्छ । तर जुन व्यक्तिमा हाइपोथाइराइडिज्म्को समस्या छ, त्यसलाई सुरुवातको अवस्थामा खासै कुनै असर देखा पर्दैन । तर बिस्तारै उक्त पाचन प्रक्रियामा ढिलोपन आउने हुँदा क्यालोरी जलन हुन नसकेका कारण मोटोपन बढ्ने, तौल घटाउन नसकिने, थकाई लाग्ने, रगतमा कोलेस्टेरोल बढ्ने, जोर्नी दुख्ने, बाँझोपन हुने र मुटुका समस्या हुने लगायत लक्षण देखिन्छ । शरीरमा यस्तो समस्या भए नभएको हेर्न रगत जाँच गर्नुपर्छ । यो समस्या पुरुषको तुलनामा महिलामा र ६० वर्ष कटेका व्यक्तिहरुमा बढी देखिन्छ । थाइराइड हर्मोनको अनुपस्थितिको मात्राको आधारमा विभिन्न खालका लक्षण तथा चिन्ह देखा पर्छन् । समस्या बिस्तारै देखा पर्ने र बढ्दै जाने गर्छन् ।