ग्वालियर साहित्य संस्थान, भारतीय पर्यटन एवं यात्रा प्रबन्ध संस्थान तथा पूर्वोत्तर हिन्दी साहित्य अकादमी भारतको संयुक्त आयोजनामा भएको दुईदिने अन्तर्राष्ट्रिय साहित्य गोष्ठीमा भरतपुर महानगर प्रज्ञाप्रतिष्ठानको तर्फबाट प्रतिनिधित्व गर्दै गएकी प्रतिष्ठानकी प्राज्ञपरिषद् सदस्य एवं कला, संस्कृति प्रमुख विष्णु देवी तिवारी ‘उषा’ गीतकार पं दामोदर शर्मा स्मृति लोक मंगल साहित्य सम्मानबाट सम्मानितसँगै पुरस्कृत भएकी छन् ।

‘स्वाधीनता और साहित्य’ विषयमा चलेको गोष्ठीको पहिलो सत्रमा वक्ता तथा प्रमुखअतिथिजस्तो गरिमामय पदमा रही उषाले ‘विदेशोँ मेँ हिन्दी भाषा, साहित्य सम्भावनाएँ एवं चुनौतियाँ’ शीर्षकमा हिन्दी भाषामा आफ्ना भनाइहरु प्रस्तुत गरेकी थिइन् ।
कार्यक्रममा नेपाल, मोरिसस, भारतका विभिन्न प्रान्तहरु असम, मेघालय, सिक्किम, दार्जिलिङ, अरूणाचल, दिल्ली, कानपुर एवं ग्वालियरआसपासका चर्चित कविहरुको उपस्थिति थियो ।

नेपाली भाषाका साथै हिन्दी भाषामा पनि दखल राख्ने उषा तिवारीका हिन्दी, नेपाली गरी तीन गजलकृतिहरु प्रकाशित छन् । साथै अब छिट्टै अनुवादित एवं मौलिक कविता, कथा र उपन्यासका तीन कृतिहरु बजारमा आउने तरखरमा छन् । भारतका विभिन्न प्रान्तहरुमा विधा वाचस्पतिलगायत एक दर्जन सम्मान एर्व पुरस्कारबाट उनी सम्मानित भैसकेकी छन् ।