नवलपुर । पूर्वी नवलपरासीमा गैँडाको आतंक बढ्न थालेको छ। जाडो मौसम शुरु भएसँगै नवलपुरमा गैँडा आतंक बढ्न थालेको हो। नवलपुरमा एक साताको बिचमा गैँडाको आक्रमणबाट दुई जना घाइते भएका छन्।
नवलपुरको कावासोती नगरपालिका–१५ मा मुसहर टोल बस्ने वर्ष ७० को सुल्तान मुसहरलाई सोमबार आक्रमण गरी घाइते बनाएका छन्। उनि किहान घरनजिकै शौचालय गएर आउने क्रममा गैँडाले आक्रमण गरी घाइते बनाएको हो।
गैँडाको आक्रमणबाट मुसहरको टाउको र बाँया कोखामा चोट लागेको र अवस्था गम्भीर रहेको जिल्ला प्रहरी कार्यालय नवलपुरले जनाएको छ।
उनको मध्यविन्दु जिल्ला अस्पताल डण्डामा प्रथामिक उपचार पश्चात थप उपचारका लागि भरतपुर सरकार अस्पताल चितवन लगिएको छ। उनको अवस्था अझै गम्भीर रहेको प्रहरीले जनाएको छ।
त्यसैगरी केही दिन अघि देवचुलीमा गैँडाको आक्रमणबाट १ जना घाइते भएका छन्। देवचुली नगरपालिका वडा न ७ घोरेघुम्टी नजिकै शुक्रबार बिहान ७ः३० बजेतिर ६३ वर्षीय सुकबहादुर तामाङलाई गैँडाले आक्रमण गरेको स्थानीयले बताए। छिमेकीको घरबाट दूध लिएर फ्रकिने क्रममा तामाङलाई गैँडाले आक्रमण गरेको हो।
तामाङको भरतपुर अस्पतालमा उपचार भइरहेको प्रहरीले जानकारी दिएको छ। उक्त दिन गैँडाले मुढाबासमा पनि एक जनालाई धक्का दिएको थियो।