चितवन, पुस ३(

भरतपुर महानगरपालिकाको सार्वजनिक क्षेत्रमा जडान गरिएको आधा भन्दा धेरै सीसीटिभी क्यामेरा सञ्चालन नहुदा अपराध नियन्त्रण कार्य कठिन भएको छ ।

बजारको चोक र सडकको वरिपरी हुने चोरी, तोडफोड र सवारी दुर्घटनाका घटनाको अनुसन्धानमा सहयोगी हुने क्यामरा बिग्रदा चितवन प्रहरीलाई अपराध नियन्त्रणमा कठिनाई भएको हो ।

जिल्ला प्रहरी कार्यालय चितवनका सूचना अधिकारी तथा प्रहरी नायव उपरीक्षक विजयराज पण्डितका अनुसार जिल्लामा ३७ वटा सीसी क्यामेरा जडान भएकोमा २० वटा क्यामरा बिग्रिएका छन् । जिल्लाको मुख्यकेन्द्र, मुग्लिङ, रामनगर, पारस बसपार्क, हाकिमचोक, चौबिसकोठी, वीरेन्द्र क्यामपसचोक, लाइन्सचोक, सहिदचोक, पुलचोक, आँपटारीलगायत अन्य विभिन्न क्षेत्रमा दुई देखि ४ गरी ३७ वटा क्यारा जडान भएको छ । तर, अहिले भने जिल्लाको मुख्य मुख्य केन्द्रमा रहेको २० वटा क्यामेरा सञ्चालनमा छैनन् जसको कारण अनुसन्धान दिनप्रति दिन कठिन हुँदै गएको छ । त्यस्तै पण्डितले नारायणी अनलाइनलाई दिएको जानकारी अनुसार जिल्लामा सञ्चालन भएको १७ वटा क्यामेरा पनि राम्रो क्वालिटीको छैन जसको कारण सडक दुर्घटनामा गाडीको नम्बर पत्ता लगाउन कठिन छ ।

पण्डितले भने ‘हामीले भरतपुर माहानगरपालिकासँग समन्वय गरेर क्यामरा मर्मतको काम त समय समयमा गर्दै आएको छौं । तर, प्राकृतिक विपत्तीका कारण मर्मत् गरिएको क्यामरा कहिले सोही दिन बिग्रने पनि गरेको छ । जसको कारण हामीले जनतालाई शान्ति सुरक्षाको अनुभूति दिलाउनै कठिन छ ।’ उनको अनुसार जिल्लामा दैनिक विभिन्न घट्ना, दुर्घटना हुने गर्छ तर जडान भएका क्यामरा क्वालिटीको नभएर सामान्य खालको हुँदा नम्बर पत्ता लगाउन कठिन छ । बढ्दो सहरीकरणका कारण जिल्लाका सबै चोकमा क्यामेरा जडान भए हामीलाई सहज हुने थियो तर जति जडान भएको छ त्यो क्यामेरा पनि सञ्चालन नहुँदा आपराधिक घटना भइहाले पनि पक्राउ गर्न कठिन छ । उनले भने, ‘महानगरले अब पुरानो क्यामेरा मर्मत नगरी नयाँ तथा राम्रो क्वालिटीको जडान गरे विभिन्न घटनाको अनुसन्धान गर्न सहज हुने थियो । ’

भरतपुर महानगरपालिकाको शाखा अधिकृत झलक श्रेष्ठका अनुसार अहिलेसम्म महानगरले क्यामेरा जडानको निर्णय भने गरेको छैन । तर, बिग्रेको क्यामेरा मर्मत गर्ने काम भने जिल्ला प्रहरीसँग समन्वय गरेर गर्दै आएको छ । नेपालको मध्य भागमा पूर्वपश्चिम राजगमार्गको केन्द्र भागमा चितवन अवस्थित भएकोले यहाँ धेरै अपराधिक घट्नाहरु हुने गर्छ । राजमार्गको छेउछाउमा हुने अपराधिक घट्ना नियन्त्रणमा मा सिसी क्यामेरा अति आवस्यक सामग्री बनेको छ ।