रत्ननगर । रत्ननगर वडा नं २ टाँडीमा मुख्य कार्यालय रहेको पेवा बचत तथा ऋण सहकारी संस्थाले एक बर्षमा एक करोड बढी मुनाफा गर्न सफल भएको छ ।

शनिबार आयोजना गरिएको सो संस्थाको १२औं बार्षिक साधारण सभामा प्रस्तुत गरिएको आर्थिक प्रतिबेदनमा आर्थिक बर्ष २०८०/८१ मा १ करोड ११ लाख ४४ हजार मुनाफा भएको जनाइएको छ । ५ करोड २९ लाख १० हजार आम्दानी गरेको सो संस्थाले ४ करोड १७ लाख ६५ हजार खर्च कटाएर १ करोड ११ लाख ४४ हजार मुनाफा गरिएको संस्थाका अध्यक्ष नवराज तिमल्सिनाले जानकारी दिए ।

५ करोड ६८ लाख ४४ हजार शेयर पूँजी रहेको सो सहकारीले ३४ करोड ४ लाख ४२ हजार ऋण लगानी गरेको छ । ३४ करोड ९ लाख ७६ हजार बचत संकलन गरेको सो सहकारीले जगेडा कोषमा २ करोड ५२ लाख ८ हजार र अन्य कोषमा १ करोड ३६ लाख रूपैया राखेको छ । वडा नं २ का वडाध्यक्ष राजेन्द्रप्रसाद घिमिरेले उद्घाटन गरेको कार्यक्रममा संस्थाका अध्यक्ष तिमल्सिनाले भावी कार्ययोजना, सचिव वालकृष्ण दाहालले प्रगति प्रतिवेदन, कोषाध्यक्ष अरुण सिवाकोटीले आर्थिक प्रतिवेदन तथा लेखा संयोजक माधव खतिवडाले आन्तरिक लेखा परीक्षण प्रतिवेदन प्रस्तुत गरेका थिए ।

संस्थाका अध्यक्ष तिमल्सिनाले शेयर सदस्यको हितलाई केन्द्रमा राखेर सहकारीले आफ्ना गतिविधि अगाडि बढाएको भन्दै सामाजिक उत्तरदायित्व स्वरुप सामाजिक काम समेग गर्दैै आएको बताए । साधारण सभामा ७ जना ज्येष्ठ नागरिक, १० जना असल ऋणि, १० जना असल बचतकर्ता, ७ जना बालबचतकर्ता, उत्कृष्ट कर्मचारीको रुपमा सुरज थापा, ६ वटा संघसंस्था, विद्याबारिधि सदस्य तर्फ डा। ताराप्रसाद ढुंगाना, समाजसेवी तर्फ उत्तम मास्के, ठाकुरप्रसाद खराललाई सम्मान गरिएको संस्थाका व्यवस्थापक किशोर भट्टराईले जानकारी दिए ।

कार्यक्रमका प्रमुख अतिथि वडाध्यक्ष घिमिरेले नीति, विधि र प्रविधिलाई अबलम्बन गरेर अगाडि बढेका सहकारीहरु जोखिम भन्दा बाहिर हरेको बताए । उनले विपन्न शेयर सदस्यको आर्थिक अबस्था उकासिने गरि उतपादनशिल क्षेत्रमा लगानी गर्न पेवालाई आग्रह गरे । कार्यक्रममा संविधान सभा सदस्य शेषनाथ अधिकारी, वडा नं १३ का वडाध्यक्ष पोटबहादुर घिमिरे, संस्थापक अध्यक्ष दुर्गाप्रसाद पौडेल, निवर्तमान अध्यक्ष गोविन्द प्रसाद भट्टराई, सल्लहाकार बद्रिप्रसाद अर्याल लगायतले मन्तव्य राखेका थिए ।

सचिव दाहालले सञ्चालन गरेको कार्यक्रममा उपाध्यक्ष डा। मधुसुदन लामिछानेले स्वागत मन्तव्य राखेका थिए । २०६९ सालमा स्थापना भएको सो सहकारीमा तीन हजार ५६७ जना शेयर सदस्य रहेका छन् ।