काठमाडौं, २५ चैत्र । जर्मनीमा ६१ वर्षीय एक पुरुषले आफ्नो शरीरमा कोभिड१९ विरुद्ध ९० डोज खोप लगाएको खुलासा भएको छ । जर्मनीको डीपीए समाचार संस्थाले जनाएअनुसार खोप लगाउन नचाहने मानिसहरूलाई खोप प्रमाणपत्र बेचेर पैसा कमाउन सकियोस् भनेर उनले खोप लगाएका हुन् । नाम सार्वजनिक नगरिएका पूर्वी जर्मनीको माग्दाबर्गका ती व्यक्तिले यसै महिनाको सुरुमा प्रहरीले फेला पार्नु अघि पूर्वी राज्य स्याक्सनीका विभिन्न खोप केन्द्रहरूमा पुगेर ९० पटक खोप लगाएका थिए । खोप लगाउन आग्रह गर्दै लगातार दोस्रो दिन स्याक्सनीको आइलेनबर्गमा रहेको खोप केन्द्रमा पुग्दा अन्ततः उनका क्रियाकलापको भण्डाफोर भएको थियो ।
उनलाई पक्राउ नगरिएपनि उनीविरुद्ध अनुसन्धानलाई भने अघि बढाइएको जनाइएको छ । खोप लगाउन नचाहने व्यक्तिहरूलाई वास्तविक खोप ब्याच नम्बरसहितको नक्कली खोप कार्डहरू बेच्न उनले बारम्बार कोभिड(१९ का खोपहरू लगाइरहेको डीपीएले जनाएको छ । फ्रि प्रेस पत्रिकाका अनुसार ६१ वर्षीय ती वृद्धाले दिनमा तीन पटकसम्म खोप लगाएका थिए । स्याक्सोनी राज्यमा मात्र उनले कोभिडविरुद्ध ८७ पटक खोप लगाएका थिए । फरक फरक ब्रान्डका ९० डोज खोप लगाउँदा उनलाई कस्तो असर रह्यो भन्नेबारेमा केही प्रष्ट पारिएको छैन । खोप लगाउन जाँदा उनले हरेक पटक आफ्नो साथमा नयाँ, खाली खोप कागजात लैजाने गर्थे ।खोप लगाएपछि उनले ब्याच नम्बरहरूको जानकारीसहितका पृष्ठहरू हटाएर खोप नलगाई खोपको प्रमाणपत्र देखाउन चाहने व्यक्तिहरूलाई बेचिदिएका थिए ।

खोप अपोइन्टमेन्टका लागि उनले आफ्नो नाम र जन्ममिति प्रयोग गरेर दर्ता गर्थे । तर अपोइन्टमेन्टहरूमा कहिल्यै आफ्नो स्वास्थ्य बीमा कार्ड प्रस्तुत नगरेको र सोही कारण उनीतर्फ शङ्काको सुई तेर्सिएको डीपीएको रिपोर्टमा उल्लेख छ ।