चितवन, २३ चैत्र । चितवनको रत्ननगरका मेयर नारायण वनलाई हिरो अफ मधेश अवार्ड प्रदान गरिएको छ। मधेशी पत्रकार समाज नेपालले मेयर वनलाई हिरो अफ मधेश अवार्डबाट सम्मान गरेको हो। तराईको जिल्ला मध्येको एक रत्ननगरका मेयर वनले आर्थिक, सामाजिक विकास र नगरको पूर्वाधार विकासमा उल्लेख्य काम गरेको भन्दै सो संस्थाले उनलाई सम्मान गरेको हो।
वीरगञ्जमा आयोजित कार्यक्रमका प्रमुख अतिथि भारतीय महाबाणिज्य दुताबास बीरगञ्जका प्रमुख शैलेन्द्रकुमार र मधेशी पत्रकार समाज नेपालका अध्यक्ष मोहनकुमार सिंहले मेयर वनलाई अवार्ड प्रदान गरेका थिए। पछिल्लो पाँच वर्षे कार्यकालमा उपत्याका बाहिर पहिलो आकासे पुल निर्माण तथा जिल्लामै पहिलो बालमैत्री नगर घोषणा गर्न सफल भएका मेयर वनले गरेको कार्यमूल्याङ्कनको आधारमा सम्मान गरिएको हो। चितवनको पर्यटन विकासको लागि सौराहामा आर्कषक सभाहल, वडा नं ९ मा होमस्टेसहितको इको पार्क निर्माण गरेका वनले झुवानीमा वाटरकिङडम निर्माण थालेका छन्। स्वास्थ्यतर्फ उनले आमा र बच्चाको सुरक्षाको लागि रत्ननगरमा मातृशिशु अस्पताल निर्माण सुरु गरेका छन्। वृद्धवृद्धालाई घरमै उपचारदेखि सुत्केरीलाई निःशुल्क एम्बुलेन्स सेवा उपलब्ध गराएका मेयर वनले रत्ननगर अस्पतालको स्तरोन्नती गरी सेवालाई प्रभावकारी बनाउन सफल भएका छन्।
धान पीडित किसानलाई केन्द्र र प्रदेश सरकारले भन्दा पहिले राहत दिएर चर्चा बटुलेका उनले विपन्न पशुपालक किसानहरुलाई अनुदानमा गाई वितरण गरेका छन्। नगरभित्रका चार वटा सामुदायिक विद्यालयमा प्राविधिक शिक्षा सुरु गरेका उनको पहलमा रत्ननगर १२ मा इन्जिनियरिङ कलेज स्थापनाको लागि पोखरा विश्व विद्यालयसँग सम्झौता गरी काम अगाडि बढाएका छन्।
उनले गरेका रचनात्मक कामले देश विदेशमा राम्रो सन्देश गएको छ मधेशी पत्रकार समाज नेपालका अध्यक्ष सिंहले भने, ‘देशभरका मेयरमध्ये उहाँले गरेको काम उत्कृष्ट देखियो, त्यसैले सम्मान गरेका हौं।’