कालिका, ९ बैशाख । महिलाहरुलाई उद्यमसँग जोड्ने उद्देश्यले कालिका नगरपालिकाले आयोजना गरेको ४५ दिने आधारभूत सिलाई कटाई तालिम आइतवार सकिएको छ । वडा नं. ४ को सभाहलमा आयोजना गरिएको तालिमको समापन नगर प्रमुख विनोद रेग्मीले गर्नुभयो । समापन कार्यक्रममा बोल्दै नगरप्रमुख विनोद रेग्मीले आर्य आर्जनमा टेवा पुग्ने उद्देश्यले तालिम प्रदान गरिएको बताउनुभयो ।
यहाँका स्थानीयलाई उद्यमशील बनाएर सम्बृद्ध पालिका बनाउने नगरपालिकाको योजना अनुसार सिलाई कटाईसँगै अन्य विभिन्न सीपमुलक तालिमहरु प्रदानगर्दै आएको जानकारी दिनुभयो ।

आर्थिक अवस्था बलियो बनाउन उत्पादन वा उद्यमशील आवश्यकपर्ने भएकाले नगरपालिकाले नगरबासीलाई उद्यमशील बनाउने लक्ष्य सहित विभिन्न सीपमूलक कार्यक्रमगर्दै आएको उहाँले बताउनुभयो । आम्दानी विना खर्च व्यस्थापन गर्न नसकिने भएकाले दैनिक जीवन सहज बनाउन हरेक नगरबासी कुनै न कुनैखालको उद्यमशील बन्नुपर्ने उहाँको तर्क छ ।
कार्यक्रममा कालिका नगरपालिकाको उप प्रमुख विमला तमाङले गरिबी निवारणका लागि लघु उद्यम विकास कार्यक्रम अन्तर्गत सिलाई कटाई तालिम आयोजना गरिएको जानकारी दिनुभयो । तालिम अवधिभर सिकेको ज्ञानलाई व्यवसायिक रुपमै कार्यान्वयनगरेको आफुहरुलाई हेर्ने रहर भएको समेत उहाँले स्पष्टपार्नुभयो ।

सामाजिक विकास संयोजक समेत रहनुभएका वडा नं. ४ का वडा अध्यक्ष मकरमान श्रेष्ठको अध्यक्षतामा आयोजना गरिएको तालिम समापन कार्यक्रममा वडा नं. ६ का वडा अध्यक्ष टिकाराम रेग्मी, कालिका नगरपालिकाका सूचना अधिकारी एवम उद्यम विकास शाखा प्रमुख प्रकाशचन्द्र पौडेल, तालिम प्रशिक्षक सुमित्रा महतोले तालिम बारे बोल्नुभएको थियो । फागुन २१ गतेदेखि आयोजना गरिएको तालिममा नगरक्षेत्रभित्रका विभिन्न वडाका २३ जना महिलाहरु सहभागि थिए । तालिममा सहभागिहरुलाई सोही अवसरमा प्रति व्यक्ति एक एकवटा कपडा सिलाउने मेसिन समेत वितरण गरिएको छ । सिलाई मेसिनमा नगरपालिकाले ८० प्रतिशत लगानी गरेको छ भने बाँकी २० प्रतिशत मेसिन पाउने सहभागीले लगानी गरेका छन् ।

सीप सिकेर मात्रै होइन सीपसँगै उद्यमी बन्न आवश्यकपर्ने प्रविधि(मेसिन) आवश्यकपर्ने भएकाले नगरपालिकाले कपडा सिलाउने मेसिन दिएर पठाएको नगर प्रमुख रेग्मीले जानकारी दिनुभयो । यस अघि, कपाल काट्ने तालिम, ब्यूटीपार्लर तालिम, पाक शिक्षा(कुक) तालिम समेत नगरपालिका दिइसकेको छ ।

तालिम समापन कार्यक्रममा वडा नं. १ का वडा अध्यक्ष सन्तवीर स्याङतान, वडा नं. २ का वडा अध्यक्ष लक्ष्मण पौडेल, वडा नं. ५ का वडा अध्यक्ष दीपक वहादुर भट्टराई लगायतका जनप्रतिनिधिहरुको समेत उपस्थिती थियो ।